WOW! ផល សោភ័ណ្ឌ ទទួចឲ្យដាក់ខ្សែក្រវាត់របស់ខ្លួនដល់កីឡាករដទៃដណ្តើមយក
ដំរីភ្លុក ផល សោភ័ណ្ឌ ដែលជាម្ចាស់ខ្សែក្រវាត់ ៥ ស្ថាប័នផ្សេងគ្នា បានសំណូមពរឲ្យម្ចាស់ឧបត្ថម្ភនៃខ្សែក្រវាត់ទាំងនោះ រៀបចំឲ្យកីឡាករដទៃប្រកួតដណ្តើមពីរូបគេ ហើយសិស្សរបស់ក្លិបតាឡីដំរីមានរិទ្ធិ ផល សោភ័ណ្ឌ បាននិយាយថា រូបគេមិនចង់ទុកចោលខ្សែក្រវាត់ ដោយឥតន័យរហូតដល់ច្រេះចាប់នោះទេ បន្ទាប់ពីបានឈ្នះនីមួយៗ ពោលគឺគ្មានតម្លៃអ្វីសោះក្នុងការទុកចោលបែបនេះ។
យ៉ាងណាមិញ សម្រាប់ការរៀបចំឲ្យមានការដណ្តើមខ្សែក្រវាត់មានប្រយោជន៍ច្រើនមានដូចជា សាមីខ្លួនជាម្ចាស់ខ្សែក្រវាត់ខិតខំហ្វឹកហាត់បន្ថែមទៀត កីឡាករណាមានសមត្ថភាពគឺ អាចយកខ្សែក្រវាត់ទៅគ្រប់គ្រងបាន ហើយធ្វើឲ្យកីឡាករអាចទទួលបានចំណូល និងមានកេរ្តិ៍ឈ្មោះល្បីកាន់តែខ្លាំង។
អ្នកលេងកែងពិឃាត ផល សោភ័ណ្ឌ បាននិយាយថា៖ បើសិនជាឈ្នះខ្សែក្រវាត់ហើយគ្មានការប្រកួតការពារខ្សែក្រវាត់ទេ នោះខ្សែក្រវាត់ដែលឈ្នះគ្មានតម្លៃ បើមានការដាក់ឲ្យប្រកួតដណ្តើមខ្សែក្រវាត់វិញ នោះកីឡាករនិងខំហ្វឹកហាត់ដើម្បីការពារ ហើយខ្សែក្រវាត់ក៏មិនត្រូវបានទុកចោល ហើយបើសិនយើងមានខ្សែក្រវាត់ យើងមិនអាចយកខ្សែក្រវាត់ដេកអោបបានទេ ប្រសិនបើយើងយកខ្សែក្រវាត់មកដេកអោប ស្មើនិងយើងខ្លាចគេ គេមានសមត្ថភាពដណ្ដើមខ្សែក្រវាត់យើងបាន ឲ្យគេយកទៅ តែបើយើងមានសមត្ថភាព យើងនៅតែការពារខ្សែក្រវាត់យើងបានដដែល។
គួរបញ្ជាក់ផងដែរថា ខ្សែក្រវាត់ ៥គ្រឿងរបស់ ផល សោភ័ណ្ឌ មានដូចជា៖ ទី១ ខ្សែក្រវាត់ គ្រុដគុនខ្មែរ ទី២ ខ្សែក្រវាត់ IPCC គុនខ្មែរ ទី៣ ខ្សែក្រវាត់ ខារ៉ាបាវ ឆ្នាំ២០១៣ ទី៤ ខ្សែក្រវាត់ ខារ៉ាបាវ ឆ្នាំ២០១២ ទី៥ ខ្សែក្រវាត់ ស្រាបៀរកម្ពុជា ឆ្នាំ២០១១