Bellingham តេស្ដសុខភាពមុនប្រកួតឲ្យ Real Madrid
Jude Bellingham ត្រូវបានគេដាក់ឲ្យតេស្ដសមត្ថភាពជាច្រើនក្នុងនាមជាកីឡាកររបស់ក្លិប Real Madrid កាលពីម្សិលមិញ ដោយខ្សែបម្រើសញ្ជាតិអង់គ្លេសរូបនេះបានចូលរួមជាមួយមិត្តរួមក្រុមជាលើកដំបូងបន្ទាប់ពីផ្ទេរពីក្លិប Borussia Dortmund ក្នុងតម្លៃ ១១៥ លានផោន។
បន្ទាប់ពីត្រូវបានបញ្ជូនទៅកាន់ការធ្វើតេស្តវេជ្ជសាស្រ្ត និងបានពិនិត្យកាយសម្បទារួចរាល់ដោយការជិះកង់ហាត់ប្រាណ និងរត់លើម៉ាស៊ីន គេសង្កេតឃើញថា Bellingham អាចនិងចាប់ដៃគូនៅតំបន់បម្រើជាមួយកីឡាករ Luka Modric និង Toni Kroos បាន យ៉ាងណាកីឡាករវ័យ ២០ ឆ្នាំបានរងរបួសជង្គង់អំឡុងរូបគេនៅក្លិបរបស់អាល្លឺម៉ង ដែលធ្វើឲ្យគេបង្ខំចិត្តដកខ្លួនចេញពីការប្រកួតជម្រុះ Euro ២០២៤ របស់ជម្រើសជាតិអង់គ្លេស ប៉ុន្តែក្រោយបញ្ចប់ការធ្វើតេស្តកាលពីម្សិលមិញរួច Bellingham បាននិយាយប្រាប់សារព័ត៌មាន Marca ថា៖”ខ្ញុំត្រៀមខ្លួនជាស្រេចក្នុងការលេង សម្រាប់ជង្គង់ពេលនេះគឺស្ថិតក្នុងស្ថានភាពល្អហើយ ខ្ញុំទន្ទឹងរង់ចាំលេងនៅកីឡដ្ឋាន Bernabeu ដោយខ្ញុំត្រៀមខ្លួនរួចជាស្រេចដើម្បីឈ្នះ”។
គួរបញ្ជាក់ថា Jude Bellingham បានបង្ហាញខ្លួនលើទីលានចំនួន ១៣២ ដងក្នុងការប្រកួតទាំងអស់សម្រាប់ក្លិប Dortmund ក្នុងរយៈពេលបីរដូវកាល និងស៊ុតបញ្ចូលទីចំនួន ២៤ គ្រាប់៕ ប្រភព៖ thesun