ជើងខ្លាំងគុនខ្មែរ ៦រូប ដែលមានខ្សែក្រវាត់ ៤គ្រឿងឡើងទៅ កំពុងសកម្មនៅលើសង្វៀន
កីឡាករប្រដាល់គុនខ្មែរមួយចំនួនបានឈ្នះខ្សែក្រវាត់កម្រិតជាតិ និងអន្តរជាតិជាច្រើនគ្រឿង ប៉ុន្តែកីឡាករខ្លះបានចូលនិវត្តន៍ក្លាយជាគ្រូបង្វឹក ខណៈអ្នកខ្លះនៅបន្តអាជីពប្រដាល់ដល់រាល់ថ្ងៃនេះ ខាងក្រោមនេះជាកីឡាករគុនខ្មែរ ៦រូបដែលបានឈ្នះខ្សែក្រវាត់ចាប់ពី ៤គ្រឿងឡើងទៅ និងកំពុងបន្តអាជីពសកម្មនៅលើសង្វៀនដល់សព្វថ្ងៃ។
១.រឿង សោភ័ណ្ឌ ជាកីឡាករម្នាក់ដែលអាចនិយាយបានថា បានឈ្នះខ្សែក្រវាត់ច្រើនជាងគេក្នុងចំណោមកីឡាករស្រករគ្នា ដោយរូបគេបានឈ្នះខ្សែក្រវាត់ចំនួន ៦គ្រឿងក្នុងអាជីព ក្នុងនោះមានដូចជា៖ ខ្សែក្រវាត់អាស៊ីអឺរ៉ុប ខ្សែក្រវាត់ស្រាបៀរកម្ពុជា ខ្សែក្រវាត់អន្តរជាតិ គោជល់វគ្គ៤ ខ្សែក្រវាត់គុនខ្មែរអន្តរជាតិ ខ្សែក្រវាត់នៅប្រទេសបារាំង និងខ្សែក្រវាត់អន្តរជាតិ គោជល់វគ្គ៨។
២.ផល សោភ័ណ្ឌ ជាកីឡាករដែលរក្សាគុណភាព និងសមត្ថភាពបានយូរទទួលបានជោគជ័យគួរឲ្យកត់សំគាល់ក្នុងអាជីពរបស់ខ្លួន រហូតដល់ពេលនេះរូបគេបានឈ្នះខ្សែក្រវាត់ជាច្រើនគ្រឿងដែលភាគច្រើនគឺជាខ្សែក្រវាត់លំដាប់អន្តរជាតិ ក្នុងនោះមានដូចជា៖ ខ្សែក្រវាត់ គ្រុដគុនខ្មែរអន្តរជាតិ ខ្សែក្រវាត់គុនខ្មែរអន្តរជាតិ IPCC ខ្សែក្រវាត់អន្តរជាតិ ខារ៉ាបាវ ២គ្រឿង និងខ្សែក្រវាត់ ស្រាបៀរកម្ពុជា។
៣.ធឿន ធារ៉ា ជាកីឡាករដែលល្បីឈ្មោះចេញពីប្រទេសថៃ និងបានអង្រួនសង្វៀនគុនខ្មែរយ៉ាងខ្លាំង បន្ទាប់ពីរូបគេបានចូលហ្វឹកហាត់ជាមួយលោកគ្រូ អេ ភូថង ក្នុងរយៈពេលប៉ុន្មានឆ្នាំចុងក្រោយនេះ រូបគេបានឈ្នះខ្សែក្រវាត់ ៤គ្រឿងគឺ ខ្សែក្រវាត់អន្តរជាតិ Thai Fight ខ្សែក្រវាត់គុនខ្មែរអន្តរជាតិ IPCC ខ្សែក្រវាត់អន្តរជាតិ គ្រុឌគុនខ្មែរ និងខ្សែក្រវាត់គុនខ្មែរពិភពលោក តេជោសន្តិភាព។
៤.ព្រំ សំណាង ជាកីឡាករទម្ងន់ធ្ងន់របស់កម្ពុជាដែលទើបតែទទួលបានជោគជ័យខ្លាំងបំផុតក្នុងរយៈពេលប្រហែលជាមួយឆ្នាំចុងក្រោយនេះ រូបគេសព្វថ្ងៃនេះកំពុងគ្រប់គ្រងខ្សែក្រវាត់អន្តរជាតិចំនួន ៤គ្រឿងគឺ ខ្សែក្រវាត់គុនខ្មែរអន្តរជាតិ KIF ខ្សែក្រវាត់អន្តរជាតិ Thai Fight ខ្សែក្រវាត់អន្តរជាតិ គ្រុឌគុនខ្មែរ និងខ្សែក្រវាត់គុនខ្មែរពិភពលោក តេជោសន្តិភាព។
៥.ឡៅ ចិត្រា ក៏ជាកីឡាករម្នាក់ដែលទទួលបានជោគជ័យខ្លាំងដែរ ប៉ុន្តែប្រហែលជាពីឆ្នាំចុងក្រោយនេះមិនសូវមានសមិទ្ធផលអ្វីគួរឲ្យកត់សំគាល់នោះទេ ក្រៅពីមេដាយមាសស៊ីហ្គេម ថ្ងៃនេះនិងបង្ហាញខ្សែក្រវាត់ ៤គ្រឿងដែលរូបគេបានឈ្នះគឺ ខ្សែក្រវាត់អន្តរជាតិ ខារ៉ាបាវ ឆ្នាំ២០១៨ ខ្សែក្រវាត់មាសនៅ PNN ឆ្នាំ២០១៩ ខ្សែក្រវាត់ប្រាក់ នៅ PNN ឆ្នាំ២០១៩ និងខ្សែក្រវាត់ប្រាក់ទី១ របស់ PNN ឆ្នាំ២០១៩។
៦.ឡៅ ចន្ទ្រា ទទួលបានជោគជ័យខ្លាំងកាលពីទម្ងន់នៅស្រាល ប៉ុន្តែនៅពេលទម្ងន់ឡើងធ្ងន់ រូបគេមិនសូវទទួលបានឱកាសប្រកួតខ្សែក្រវាត់ទេ យ៉ាងណាមិញ ថ្ងៃនេះនិងបង្ហាញខ្សែក្រវាត់ ៤គ្រឿងដែលរូបគេកំពុងគ្រប់គ្រងគឺ ខ្សែក្រវាត់ស្រាបៀរលីអូ ឆ្នាំ២០១៤ នៅ PNN ខ្សែក្រវាត់ស្រាបៀរលីអូ ឆ្នាំ២០១៦ នៅ CTN ខ្សែក្រវាត់អន្តរជាតិ គូបូតា ឆ្នាំ២០១៦ នៅបាយ័ន និងខ្សែក្រវាត់ ISI Palm នៅសង្វៀន CTN៕