លោក Ancelotti និយាយថា Real Madrid ពេញលេងហើយ នៅមុនរដូវកាលថ្មីនេះ។
គ្រូបង្វឹក Real Madrid លោក Carlo Ancelotti បាននិយាយថា លោកសប្បាយចិត្តនឹងការចុះហត្ថលេខាដែលធ្វើនៅរដូវក្ដៅនេះ ដោយអាចនាំយកកីឡាករដូចជា Jude Bellingham, Fran Garcia និង Arda Guler ខណៈដែល Joselu ស្ថិតក្នុងលក្ខខណ្ឌខ្ចីជើងពេញមួយរដូវកាល។
ក្នុងនោះខ្សែបម្រើ Brahim Diaz ក៏បានត្រលប់មកវិញបន្ទាប់ពីខ្ចីជើងទៅកាន់ក្លិប AC Milan យ៉ាងណាក្លិបនៅអេស៉្បាញមួយនេះក៏បានបាត់បង់តារាឆ្នើមរបស់ខ្លួនមាន Karim Benzema និង Marco Asensio ដែលបានចាកចេញពីកីឡដ្ឋាន Santiago Bernabeu ក្នុងការផ្ទេរដោយឥតគិតថ្លៃ។
ចំពោះ Real Madrid ក៏កំពុងតាមប្រមាញ់ខ្សែប្រយុទ្ធ Kylian Mbappe របស់ក្លិប Paris Saint-Germain ដើម្បីជំនួសដំណែង Benzema ប៉ុន្តែមិនមានភាពប្រាកដប្រជាណាមួយថាតើពួកគេនឹងអាចចុះហត្ថលេខាលើកីឡាករវ័យ ២៤ ឆ្នាំនៅរដូវក្តៅនេះឬយ៉ាងណា?
ទោះបីជាបែបនេះក្ដីលោក Ancelotti ជឿជាក់ថាក្រុម Real Madrid មានទម្រង់លេងយ៉ាងល្អមុនរដូវកាលថ្មីមកដល់ ថ្លែងបន្ទាប់ពីទទួលជ័យជម្នះក្នុងការប្រកួតមិត្តភាពដោយលទ្ធផល ២-០ ជាមួយ Manchester United នៅថ្ងៃទី ២៧ ខែកក្កដា ដោយលោកបានប្រាប់សារព័ត៌មាន MadridUniversal ថា៖ “យើងមានក្រុមដែលមានគុណភាព រូបរាងកាយសម្បទាមាំមួន និងបច្ចេកទេសដ៏អស្ចារ្យ ក្រុមនេះគឺល្អណាស់ ហើយនឹងបានប្រសើរឡើងបន្ថែមទៀត យើងមានក្រុមដែលមិនមានភាពអាត្មានិយមហើយសាមញ្ញងាយស្រួលក្នុងការគ្រប់គ្រង”។
គួរបញ្ជាក់ថា Real Madrid នឹងចាប់ផ្ដើមការប្រកួតបើករដូវកាលថ្មីនៃលីគកំពូល La Liga ២០២៣/២៤ នៅថ្ងៃទី ១២ ខែសីហា ដោយប៉ះជាមួយក្រុមម្ចាស់ផ្ទះ Athletic Bilbao៕ ប្រភព៖ sportskeeda