ផល សោភ័ណ្ឌ ត្រូវប្រកួតជាមួយម្ចាស់ខ្សែក្រវាត់ របស់ម្ចាស់ផ្ទះរុស្ស៊ី នៅថ្ងៃសុក្រ ស្អែកនេះ ប្រកួតបែបឃីកបុកស៊ីង
ជើងខ្លាំង ផល សោភ័ណ្ឌ នឹងត្រូវឡើងប្រកួតជាមួយម្ចាស់ខ្សែក្រវាត់ Kamran Nabati របស់រុស្ស៊ី នៅក្នុងព្រឹត្តិការណ៍ RCC Fair Fight 22 នៅទីក្រុងម៉ូស្គូ ប្រទេសរុស្ស៊ី នាថ្ងៃទី ១៨ ខែសីហា ឆ្នាំ២០២៣ ហើយនេះជាកម្មវិធីលំដាប់ពិភពលោកដែលមានការប្រកួតរហូតដល់ ១៩ គូ ខណៈសមាសភាពកីឡាករអន្តរជាតិដែលត្រូវបានអញ្ជើញឲ្យចូលរួមសុទ្ធតែជាជើងខ្លាំង។
បើទោះបីជា ផល សោភ័ណ្ឌ ធ្លាប់មានបទពិសោធន៍ប្រកួតអន្តរជាតិច្រើនក៏ដោយ ប៉ុន្តែនេះជាលើកទី១ ហើយដែលរូបគេទទួលបានឱកាសទៅចូលរួមការប្រកួតលំដាប់ពិភពលោក នៅប្រទេសរុស្ស៊ី ព្រោះ សោភ័ណ្ឌ ធ្លាប់ឈ្នះបានខ្សែក្រវាត់ IPCC នៅសង្វៀនថោន ហើយស្ថាប័ន International Professional Combat Council (IPCC) នេះ ជាដៃគូសហការយ៉ាងសំខាន់ជាមួយម្ចាស់ផ្ទះរុស្ស៊ី ដើម្បីរៀបចំព្រឹត្តិការណ៍ RCC Fair Fight 22 នេះផងដែរ។
យ៉ាងណាមិញ ប្រធានសហព័ន្ធកីឡាប្រដាល់គុនខ្មែរប្រចាំប្រទេសរុស្ស៊ី លោក Oleg Kudrinsky បាននិយាយថា៖ “ការប្រកួតនេះ នឹងក្លាយជាការប្រកួតដ៏លំបាករបស់ ផល សោភ័ណ្ឌ ក្នុងការស្វែងរកជ័យជម្នះ ព្រោះដៃគូរបស់គេ Kamran Nabati ជាអ្នកប្រដាល់ដ៏ឆ្លាតវៃ និងមានកណ្តាប់ដៃវាយចេញដ៏មានប្រសិទ្ធភាព”។
លោក Tommy Kim ក៏បានតបថា៖ “បើទោះបីជាកីឡាកររុស្ស៊ីម្នាក់នេះ មានជំនាញខាងប្រើកណ្តាប់ដៃ ប៉ុន្តែ ផល សោភ័ណ្ឌ ក៏មានផ្លែសម្លាប់ដូចគ្នា ជាពិសេសកែងរបស់គេ ហេតុនេះឱកាសឈ្នះមានដូចគ្នា គឺខ្ញុំមានការជឿជាក់ទៅលើគាត់ ហើយប្រសិនបើ សោភ័ណ្ឌ ទទួលបានជ័យជម្នះមែន នោះប្រទេសជាច្រើននៅលើពិភពលោកនឹងមានការកោតសរសើរ និងស្គាល់គុនខ្មែរកាន់តែច្បាស់ ដែលចំណុចនេះ នឹងធ្វើឲ្យទីផ្សារប្រកួតនៅលើឆាកអន្តរជាតិរបស់កីឡាករកម្ពុជា កាន់តែរីកធំឡើងៗ”។
ជាមួយគ្នានេះដែរ ផល សោភ័ណ្ឌ ក៏បានបញ្ជាក់ដែរថា៖ “ក្នុងរយៈពេលជាង ១ឆ្នាំកន្លងមកនេះ រូបគេបានប្រឹងប្រែងហ្វឹកហាត់ខ្លាំង ពង្រឹងសមត្ថភាពខ្លួនឯង ដែលធ្វើឲ្យការប្រកួតប្រមាណ ១៧ដងចុងក្រោយនេះ រូបគេមិនដែលចាញ់នោះទេ ចំណែកការបង្ហាញខ្លួននៅក្នុងព្រឹត្តិការណ៍ RCC Fair Fight 22 នេះ រូបគេបានដាក់ចិត្តខ្លាំង ក្នុងការប្រកួតតំណាងឲ្យកម្ពុជា ហើយរូបគេក៏យកការប្រកួតនេះ ដើម្បីជួយដល់ការងារសប្បុរសធម៌ ហើយទោះបីឈ្នះ ឬចាញ់ ខ្ញុំនឹងដក ៥ភាគរយនៃតម្លៃខ្លួនរបស់ខ្ញុំជូនទៅមន្ទីរពេទ្យគន្ធបុប្ផា ផងដែរ”៕