ក្រុមជម្រើសជាតិបាល់ទះ ជប៉ុន និងក្រុមជម្រើសជាតិបាល់ទះ អ៊ីរ៉ង់ ឡើងវគ្គពាក់កណ្តាលផ្តាច់ព្រ័ត្រមុនគេនៃជើងឯកអាស៊ី
ក្រុមបាល់ទះជម្រើសជាតិ ជប៉ុន និងម្ចាស់ផ្ទះ អ៊ីរ៉ង់ បានឡើងទៅដល់វគ្គពាក់កណ្តាលផ្តាច់ព្រ័ត្រមុនគេក្នុងការប្រកួតបាល់ទះជើងឯកអាស៊ី ឆ្នាំ២០២៣ បន្ទាប់ពីគ្មានដៃគូប្រកួតនៅវគ្គ ៨ក្រុមចុងក្រោយ ហើយការប្រកួតបាល់ទះជើងឯកអាស៊ី ឆ្នាំ២០២៣ នេះ មានក្រុមដែលជាប់វគ្គជម្រុះចំនួន ២១ ប៉ុន្តែនៅសល់តែ ១៧ក្រុមប៉ុណ្ណោះ បានចូលរួមប្រកួត ពីព្រោះ អូស្ត្រាលី អារ៉ាប៊ីសាអ៊ូឌីត ស្រីលង្កា និងម៉ុងហ្គោលី បានដកខ្លួន។
ពិតណាស់ ការបែងចែកពូលខ្លះមាន ៣ក្រុម ហើយពូលខ្លះមាន ២ក្រុមប៉ុណ្ណោះ ខណៈការប្រកួតសន្សំពិន្ទុក្នុងពូលទាំង ៦ត្រូវជ្រើសរើសយកក្រុមលេខ១ និងលេខ២ ឡើងទៅវគ្គបន្ត ដោយការជ្រើសរើសយកក្រុមលេខ១ និងលេខ២ ពីពូលទាំង៦ ដូច្នេះមាន ១២ក្រុមឡើងវគ្គបន្ត ដើម្បីប្រកួតឡើងទៅកាន់វគ្គ ៨ក្រុមចុងក្រោយ ដោយបែបនេះហើយបានជាក្រុមម្ចាស់ផ្ទះ អ៊ីរ៉ង់ និង ជប៉ុន បានឡើងទៅកាន់វគ្គពាក់កណ្តាលផ្តាច់ព្រ័ត្រមុនគេ ដោយសារមិនចាំបាច់ឆ្លងកាត់ការប្រកួតវគ្គ ៨ក្រុមចុងក្រោយ បន្ទាប់ពី អ៊ីរ៉ង់ ឈ្នះ ប៉ាគីស្ថាន ៣-០ ហើយ ជប៉ុន ឈ្នះ បារ៉ែន ៣-០ នៅវគ្គ ១២ក្រុមចុងក្រោយ។
យ៉ាងណាមិញ ថៃ បានចាញ់ កាតា ៣-០ នៅវគ្គ ១២ក្រុមចុងក្រោយ ខណៈ ចិន បានឈ្នះ ឥណ្ឌា ទាំងលំបាក ៣-២ នៅវគ្គ ១២ក្រុមចុងក្រោយដែរ ដោយឡែក កូរ៉េខាងត្បូង ក៏បានឡើងទៅវគ្គ ៨ក្រុមចុងក្រោយដែរ ក្រោយឈ្នះម្ចាស់មេដាយមាសស៊ីហ្គេម ឥណ្ឌូណេស៊ី យ៉ាងតឹងតែង ៣-២។
គួរបញ្ជាក់ផងដែរថា ការប្រកួតវគ្គ ៨ក្រុមចុងក្រោយ នឹងធ្វើឡើងនៅថ្ងៃទី ២៤ ខែសីហា ឆ្នាំ២០២៣ នេះ ដោយ ចិន ត្រូវប៉ះ កូរ៉េខាងត្បូង សម្រាប់ក្រុមឈ្នះ បន្តទៅជួប អ៊ីរ៉ង់ វគ្គពាក់កណ្តាលផ្តាច់ព្រ័ត្រ ខណៈ ឆាយនីសតៃប៊ិ ត្រូវប៉ះ កាតា ហើយសម្រាប់ក្រុមដែលឈ្នះ នឹងបន្តទៅជួប ជប៉ុន វគ្គពាក់កណ្តាលផ្តាច់ព្រ័ត្រ៕