ពេលនេះ ជើងឯកបាល់ទះអាស៊ី បានរកឃើញ ៤ក្រុមហើយ ដែលឡើងទៅវគ្គពាក់កណ្តាលផ្តាច់ព្រ័ត្រ
ការប្រកួតបាល់ទះជើងឯកអាស៊ីឆ្នាំ ២០២៣ បានឈានដល់វគ្គពាក់កណ្តាលផ្តាច់ព្រ័ត្រហើយ ដែលនឹងប្រកួតនៅថ្ងៃទី ២៥ ខែសីហា ឆ្នាំ២០២៣ ដោយក្រុមម្ចាស់ផ្ទះអ៊ីរ៉ង់ ត្រូវជួបជាមួយ ចិន នៅវគ្គពាក់កណ្តាលផ្តាច់ព្រ័ត្រ ហើយក្រុមទាំង ២ នេះមានប្រវត្តិជួបគ្នាសរុប ២៤លើក ក្នុងនោះ អ៊ីរ៉ង់ ធ្លាប់ឈ្នះ ២០លើក ខណៈ ចិន ធ្លាប់ឈ្នះតែ ៤លើកប៉ុណ្ណោះ។
ពិតណាស់ កាលពីឆ្នាំ ២០១១ ក្រុមទាំង ២ បានជួបគ្នានៅវគ្គផ្តាច់ព្រ័ត្រ ជើងឯកអាស៊ី នេះ ដែលពេលនោះ អ៊ីរ៉ង់ បានយកឈ្នះ ចិន ក្នុងលទ្ធផល ៣-១ ដើម្បីក្លាយជាជើងឯក ដោយក្រុមទាំង ២ សុទ្ធតែធ្លាប់គ្រងជើងឯកអាស៊ី ដូចគ្នា គឺក្រុមបាល់ទះ អ៊ីរ៉ង់ ធ្លាប់ឈ្នះជើងឯកអាស៊ី ៤សម័យកាល ចំណែកក្រុមបាល់ទះជម្រើសជាតិ ចិន ឈ្នះជើងឯកអាស៊ីបាន ៣ សម័យកាល។
យ៉ាងណាមិញ សម្រាប់ជំនួបក្នុងវគ្គពាក់កណ្តាលព្រ័ត្រមួយគូទៀត គឺក្រុមខ្លាំង ជប៉ុន ត្រូវប៉ះក្រុមខ្លាំង កាតា ដោយក្រុមបាល់ទះ កាតា មិនសូវលេចធ្លោប៉ុន្មាននោះទេ ក្នុងរង្វាន់បាល់ទះអាស៊ី ប៉ុន្តែប្រវត្តិល្អបំផុតរបស់ពួកគេ គឺបានត្រឹមចំណាត់ថ្នាក់លេខ ៤ ម្តងគត់កាលពីឆ្នាំ ២០១៥ ចំណែក ជប៉ុន វិញ គឺជាក្រុមខ្លាំងក្នុងតំបន់អាស៊ី ហើយក៏ជាម្ចាស់ជើងឯកអាស៊ី ៩សម័យកាលផងដែរ ហើយក្រុមទាំង២ មានប្រវត្តិជួបគ្នា ៧លើក ក្នុងនោះក្រុមបាល់ទះ ជប៉ុន ឈ្នះ ៤លើក និងក្រុមបាល់ទះ កាតា ឈ្នះ ៣លើក។
គួរបញ្ជាក់ផងដែរថា ការប្រកួតនៅវគ្គពាក់កណ្តាលផ្តាច់ព្រ័ត្រ នៃពានរង្វាន់បាល់ទះជើងឯកអាស៊ី ឆ្នាំ ២០២៣ គេនឹងធ្វើឡើង នៅថ្ងៃទី២៥ ខែសីហា ឆ្នាំ២០២៣ នេះហើយ ដោយក្រុមបាល់ទះ អ៊ីរ៉ង់ ត្រូវប៉ះក្រុមបាល់ទះ ចិន និងក្រុមបាល់ទះ ជប៉ុន ត្រូវតទល់ជាមួយក្រុមបាល់ទះ កាតា៕