អបអរ ឯកឧត្ដមអភិសន្តិបណ្ឌិត ស សុខា បានជាប់ឈ្មោះជាប្រធានសហព័ន្ធកីឡាបាល់ទះកម្ពុជា ជំនួសឯកឧត្ដមបណ្ឌិត នេត សាវឿន
ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ ត្រូវបានសន្និបាតវិសាមញ្ញសហព័ន្ធកីឡាបាល់ទះកម្ពុជា អាណត្តិទី៧ ជ្រើសរើសឲ្យកាន់តំណែងជាប្រធានសហព័ន្ធកីឡាបាល់ទះកម្ពុជា ក្នុងអាណត្តិថ្មីនេះ ដែលធ្វើឡើងនៅកីឡដ្ឋានព្រីនស៍ ក្នុងរាជធានីភ្នំពេញ។
ពិតណាស់ នេះបេសកកម្មថ្មីរបស់ឯកឧត្តមអភិសន្តិបណ្ឌិត ស សុខា ស្របពេលដែលអាណត្តិមុនៗ កាន់តំណែងជាអនុប្រធានសហព័ន្ធបាល់ទះកម្ពុជា ដែលមានឯកឧត្តមឧបនាយករដ្ឋមន្រ្តីសន្តិបណ្ឌិត នេត សាវឿន ជាប្រធានសហព័ន្ធបាល់ទះកម្ពុជា ហើយកន្លងទៅសហព័ន្ធបាល់ទះកម្ពុជា ជាផ្នែកមួយរបស់កម្ពុជា ទទួលធ្វើជាម្ចាស់ផ្ទះស៊ីហ្គេមលើកទី៣២ ដោយជោគជ័យអំឡុង ខែឧសភា ឆ្នាំ២០២៣ កន្លងទៅ ស្របពេលដែលក្រុមបាល់ទះបុរសក្នុងសាលកម្ពុជា បានឈានដល់វគ្គផ្ដាច់ព្រ័ត្រ ឈ្នះមេដាយប្រាក់ ខណៈកាលពីស៊ីហ្គេមនៅហាណូយ ប្រទេសវៀតណាម ឆ្នាំ២០២១ កម្ពុជា ឈ្នះមេដាយសំរឹទ្ធិ។
គួរបញ្ជាក់ផងដែរថា ឯកឧត្តមបណ្ឌិត ស សុខា បានតាំងចិត្តថា នឹងបន្តដឹកនាំសហព័ន្ធកីឡាបាល់ទះកម្ពុជា ឲ្យបានកាន់តែប្រសើរឡើងនិងចូលខ្លួនក្នុងឆាកអន្តរជាតិ ទាំងការបណ្ដុះបណ្ដាលធនធានមនុស្សអាជ្ញាកណ្ដាល មន្រ្តីបច្ចេកទេស យុវជនថ្នាល ការកសាងហេដ្ឋារចនាសម្ព័ន្ធ បង្កើតព្រឹត្តិការណ៍ប្រកួតប្រជែងក្នុងស្រុក និងបញ្ជូនក្រុមកីឡាចេញទៅដណ្តើមមេដាយ និងពានរង្វាន់ជូនជាតិមាតុភូមិ ផងដែរ៕