កីឡាករបាល់ទះជម្រើសជាតិកម្ពុជា វឿន វាសនា ថា ការហ្វឹកហាត់នៅចិននឹងជួយឲ្យកម្ពុជា សាងប្រវត្តិសាស្រ្តជូនជាតិម្តងទៀត

កីឡាករជម្រើសជាតិបាល់ទះកម្ពុជា វឿន វាសនា បានឲ្យដឹងថា ការហ្វឹកហាត់នៅប្រទេសចិន នឹងជួយពង្រឹងសមត្ថភាពក្រុមជម្រើសជាតិបាល់ទះកម្ពុជាបន្ថែមទៀត ដើម្បីបង្ហាញខ្លួនកាន់តែល្អ ក្នុងការប្រកួតកីឡាអាស៊ីលើកទី១៩ នៅទឹកដីមហាអំណាចមួយនេះ។

អ្នកវាយបាល់ឆ្ងាយរបស់កម្ពុជា វឿន វាសនា បាននិយាយថា៖ “ខ្ញុំសង្ឃឹមថាពួកយើងនឹងអាចកសាងប្រវត្តិសាស្រ្តមួយទៀត សម្រាប់ពានអន្តរជាតិ ដែលមានប្រទេសជាច្រើនចូលរួម ហើយសម្រាប់ការបោះជំរុំហ្វឹកហាត់នៅប្រទេសចិន ខ្ញុំរំពឹងថាទទួលបានការប្រកួតមិត្តភាពជាច្រើននៅទីនោះ ហើយនឹងព្យាយាមក្រេបជញ្ជក់យកចំណេះដឹងបន្ថែមទៀតពីពួកគេ”។

ពិតណាស់ នៅក្នុងបេសកម្មបង្ហាញខ្លួនលើកដំបូង ក្នុងព្រឹត្តិការណ៍កីឡាអាស៊ី លើកទី១៩ នៅប្រទេសចិន នេះ ម្ចាស់អាវលេខ៩ របស់ក្រុមជម្រើសជាតិកម្ពុជា វឿន វាសនា បានចាត់ទុកការប្រកួតលំដាប់ទ្វីបអាស៊ី នេះ វារឿងលំបាកសម្រាប់ក្រុមទាំងមូល ព្រោះបណ្តាប្រទេសដែលចូលរួម សុទ្ធតែមានសមត្ថភាពខ្ពស់ ជាពិសេសកីឡាករនីមួយៗ ពោរពេញដោយគុណភាព និងសក្តានុពល។

គួរបញ្ជាក់ផងដែរថា ក្រុមបាល់ទះជម្រើសជាតិកម្ពុជា នឹងត្រូវហ្វឹកហាត់នៅប្រទេសចិន រហូតដល់ដំណាច់ឆ្នាំ២០២៣ នេះ ហើយក្រុមបាល់ទះកម្ពុជា ក៏នឹងត្រូវចូលរួមការប្រកួតក្នុងព្រឹត្តិការណ៍កីឡាអាស៊ី លើកទី១៩ ចាប់ពីថ្ងៃទី២៣ ខែកញ្ញា ដល់ថ្ងៃទី៨ ខែតុលា ឆ្នាំ២០២៣ នៅទីក្រុងហានចូវ ប្រទេសចិន៕