គ្រូជំនាញ ៣នាក់ បានវិភាគជំនួបអ្នកលេងក្បាច់ ឃីម បូរ៉ា និង ក្របីព្រៃ ពេជ្រ សម្បត្តិ នាថ្ងៃខាងមុខនេះ
អ្នកលេងគុនខ្មែរដែលកំពុងល្បីឈ្មោះ ពេជ្រ សម្បត្តិ ប៉ះអ្នកលេងក្បាច់ ឃីម បូរ៉ា បានកំពុងក្លាយជាប្រធានបទដ៏ក្តៅគគុក សម្រាប់អ្នកគាំទ្រ និងសម្រាប់អ្នកវិភាគ ដែលតែងតែជជែកវែកញែកអស់រយៈពេលជាច្រើនថ្ងៃមកហើយ មុនពេលនេះអ្នកទាំងពីរត្រូវជួបគ្នានាចុងសប្តាហ៍នេះ។
ពិតណាស់ នេះជាលើកដំបូងហើយសម្រាប់អ្នកប្រើកម្លាំង ពេជ្រ សម្បត្តិ និងអ្នកប្រើក្បាច់ ឃីម បូរ៉ា ក្នុងការប៉ះគ្នា ហើយជំនួបនេះដែល បានធ្វើឲ្យមានមតិលើកឡើងជាច្រើនពីអ្នកគាំទ្រ និងអ្នកស្នេហាប្រដាល់គុនខ្មែរ។
យ៉ាងណាមិញ លោក នួន សូរីយ៉ា អតីតអ្នកប្រដាល់ដែលរស់នៅសហរដ្ឋអាមេរិក បាននិយាយថា៖ “ក្បាច់សំខាន់របស់ ពេជ្រ សម្បត្តិ គឺបុកដៃគូឲ្យអស់កម្លាំង នៅពេលដៃគូចុះខ្សោយអស់កម្លាំង គឺជាឱកាសដែលត្រូវផ្តួលបានហើយ ចំណែក ឃីម បូរ៉ា ជាកីឡាករមានក្បាច់គ្រប់គ្រឿងគឺកណ្តាប់ដៃ ទាត់ ជង្គង់ និងកែង ប៉ុន្តែកម្លាំងខ្សោយ បូរ៉ា អាចវ៉ៃ ៥ទឹកបានល្អ ទាល់តែប៉ះដៃគូវ៉ៃបច្ចេកទេសដូចគ្នា ប៉ុន្តែបើ ប៉ះដៃគូវ៉ៃបុកគឺគាត់ពិបាកស៊ូបាន ៥ទឹកពេញណាស់”។ ហើយសម្រាប់ជំនួបនេះ លោក នួន សូរិយ៉ា គិតថា ពេជ្រ សម្បត្តិ អាចឈ្នះ ដោយសារមានប្រៀបកម្លាំង។
ជាមួយគ្នានេះផងដែរ លោក សេន ប៊ុនថេន ជាគ្រូបង្វឹកម្នាក់ បានលើកឡើងថា៖ គូនេះគឺ ៥០-៥០ ប្រសិនបើ ឃីម បូរ៉ា អស់កម្លាំងស៊ុស អាចនឹងចាញ់ ពេជ្រ សម្បត្តិ ប៉ុន្តែប្រសិនបើមិនអស់កម្លាំងស៊ុសទេ ពេជ្រ សម្បត្តិ អាចជាអ្នកពិបាកវិញ”។
ចំណែកឯលោកគ្រូ អេ ភូថង បាននិយាយថា៖ ៖ប្រសិនបើ ឃីម បូរ៉ា តតាំងទល់មុខគឺពិបាករបស់ ពេជ្រ សម្បត្តិ ហើយ ប៉ុន្តែ បូរ៉ា ជាកីឡាករវ៉ៃក្បាច់ឆ្វេង-ស្តាំ យ៉ាងណា សម្រាប់គូនេះ លោកគ្រូឲ្យ ឃីម បូរ៉ា មាន ៦០% ខណៈ ពេជ្រ សម្បត្តិ ៤០% ដោយសារ បូរ៉ា ជាសិស្សច្បង។
គួរបញ្ជាក់ថា សម្រាប់ជំនួបអ្នកទាំងពីរ នឹងធ្វើឡើងនៅល្ងាចថ្ងៃអាទិត្យ ទី៣ ខែកញ្ញា ឆ្នាំ២០២៣ នៅសង្វៀនទូរទស្សន៍ជាតិកម្ពុជាក្នុងតំបន់ OCIC ជ្រោយចង្វារ រាជធានីភ្នំពេញ ហើយទាំងពីរសុទ្ធតែដាក់ខ្សែក្រវាត់ម្នាក់ ១គ្រឿង ដូច្នេះមានន័យថា បើអ្នកឈ្នះការពារខ្សែក្រវាត់ខ្លួនបានជោគជ័យ ហើយនឹងទទួលបានខ្សែក្រវាត់ Krud ទម្ងន់ ៦០គីឡូក្រាម ១គ្រឿងទៀត៕