WOW! ក្តីស្រមៃរបស់កីឡាករ ផល សោភ័ណ្ឌ បានក្លាយជាការពិតហើយ
អ្នកប្រដាល់គុនខ្មែរ ផល សោភ័ណ្ឌ បានចូលក្របខណ្ឌរដ្ឋជាប៉ូលិសនៅក្រសួងមហាផ្ទៃ តាមបំណងប្រាថ្នាច្រើនឆ្នាំមកហើយ បន្ទាប់ពីរូបគេបានខិតខំប្រឹងប្រែងក្នុងអាជីពប្រដាល់អស់រយៈពេលប្រមាណ ១០ឆ្នាំកន្លងមក។
ពិតណាស់ ផល សោភ័ណ្ឌ បានចាត់ទុកការទទួលបានក្របខណ្ឌរដ្ឋជាប៉ូលិសនៅក្រសួងមហាផ្ទៃនេះ គឺជាក្តីស្រមៃក្លាយជាការពិត ហើយកីឡាកររបស់ក្លិបតាឡីដំរីមានរិទ្ធបាននិយាយថា៖ “ក្តីស្រមៃខ្ញុំច្រើនឆ្នាំមកនេះ បានក្លាយជាការពិតហើយ អគុណកីឡាប្រដាល់ អគុណដល់ ក្លិបប្រដាល់តាឡីដំរីមានរឹទ្ធធ្វើឲ្យខ្ញុំមានថ្ងៃនេះ.! ជាពិសេសអរគុណដល់អ្នកគាំទ្ររបស់ខ្ញុំ”។
យ៉ាងណាមិញ ផល សោភ័ណ្ឌ ដែលជាអតីតកីឡាករប្រដាល់សកលជម្រើសជាតិកម្ពុជា និងជាអ្នកលេងគុនខ្មែរមួយរូបដែលរក្សាសមត្ថភាពបានល្អយូរអង្វែង រហូតដល់ ឆ្នាំ២០២៣ នេះរូបគេកំពុងគ្រប់គ្រងខ្សែក្រវាត់ ៥គ្រឿង គឺខ្សែក្រវាត់គុនខ្មែរអន្តរជាតិ IPCC ខ្សែក្រវាត់អន្តរជាតិខារ៉ាបាវ ២គ្រឿង ខ្សែក្រវាត់ស្រាបៀរកម្ពុជា និងខ្សែក្រវាត់គ្រុឌអន្តរជាតិ។
គួរបញ្ជាក់ផងដែរថា បច្ចុប្បន្ននេះ មានកីឡាករ កីឡាការិនីប្រដាល់គុនខ្មែរ និងឃីកបុកស៊ីងជាច្រើនរូប ទទួលបានក្របខណ្ឌរដ្ឋក្លាយជាប៉ូលិស និងទាហានតាមរយៈអាជីពប្រដាល់ ហើយនេះជាផ្នែកមួយដ៏សំខាន់ដែលជួយឲ្យពួកគេទទួលបានចំណូលសម្រាប់ចិញ្ចឹមគ្រួសារនៅពេលឡើងប្រកួតលែងកើត៕