WOW! ខ្លាំងប៉ះខ្លាំង នៅវគ្គ Semi-finals បាល់ទះជើងឯកផ្នែកនារីប្រចាំទ្វីបអាស៊ី ២០២៣ ហើយ
ពេលនេះរកឃើញ ៤ក្រុមហើយដែលត្រូវប៉ះគ្នា គឺ ថៃ ប៉ះជប៉ុន ខណៈ វៀតណាម ប៉ះចិន នៅក្នុងការប្រកួតវគ្គពាក់កណ្ដាលផ្ដាច់ព្រ័ត្រ (Semi-finals) ព្រឹត្តិការណ៍បាល់ទះជើងឯកផ្នែកនារីប្រចាំទ្វីបអាស៊ី 2023 Asian Women’s Volleyball Championship ដែលមានការចូលរួមចំនួន ១៤ប្រទេស ធ្វើឡើងនៅក្នុងខេត្តនគររាជសីមា ចាប់ផ្ដើមប្រកួតពីថ្ងៃទី៣០ ខែសីហា រហូតដល់ថ្ងៃទី០៦ ខែកញ្ញា ឆ្នាំ២០២៣ ។
ពិតណាស់ ការប្រកួតវគ្គពាក់កណ្ដាលផ្ដាច់ព្រ័ត្រ នឹងធ្វើឡើងនៅថ្ងៃនេះហើយ ក្នុងនោះមាន៖ ក្រុមបាល់ទះនារី ថៃ ប៉ះក្រុមបាល់ទះនារី ជប៉ុន នៅក្នុងសាល MCC Hall The Mall Korat វេលាម៉ោង ០៣ៈ០០នាទីរសៀល និងក្រុមបាល់ទះនារី វៀតណាម ប៉ះក្រុមបាល់ទះនារី ចិន នៅក្នុងសាល MCC Hall The Mall Korat វេលាម៉ោង ០៦ៈ០០នាទីល្ងាច។
យ៉ាងណាមិញ សម្រាប់ការប្រកួតបាល់ទះជើងឯកប្រចាំទ្វីបអាស៊ី នេះ ២ក្រុមដែលឡើងដល់វគ្គផ្ដាច់ព្រ័ត្រពានរង្វាន់មួយនេះ នឹងមានឈ្មោះចេញទៅប្រកួតក្នុងពានរង្វាន់ជើងឯកពិភពលោក 2025 FIVB Volleyball Women’s World Championship ដោយស្វ័យប្រវត្តិ។
គួរបញ្ជាក់ផងដែរថា ពានរង្វាន់បាល់ទះជើងឯកប្រចាំទ្វីបអាស៊ីសម្រាប់នារី នេះរៀបចំរាល់ ៤ឆ្នាំម្តង ដោយធ្វើឡើងចាប់ពីឆ្នាំ១៩៧៥ ដល់ឆ្នាំ១៩៨៧ ទើបចាប់ផ្ដើមរៀបចំ ២ឆ្នាំម្ដង ដោយមានក្រុមចូលរួមទាំងតំបន់អាស៊ីនិងដែនកោះមួយចំនួនក្នុងមហាសមុទ្រប៉ាស៊ីហ្វិក ហើយ ចិន ឈ្នះជើងឯកបានច្រើនជាងគេ រហូតដល់ ១៣លើក គឺឆ្នាំ (១៩៧៩ ១៩៨៧ ១៩៨៩ ១៩៩១ ១៩៩៣ ១៩៩៥ ១៩៩៧ ១៩៩៩ ២០០១ ២០០៣ ២០០៥ ២០១១ និង ២០១៥) ចំណែកឯ ជប៉ុន វិញបានឈ្នះចំនួន ៥លើក គឺឆ្នាំ (១៩៧៥ ១៩៨៣ ២០០៧ ២០១៧ និង ២០១៩) និង ថៃ បានឈ្នះចំនួន ២លើក (២០០៩ និង ២០១៣)៕