ការប្រកួតដណ្តើមខ្សែក្រវាត់ ៦ ខ្សែ របស់ Krud Kun Khmer បានបំបែកកំណត់ត្រាមានអ្នកមើលដល់ ៦ លាននាក់
ការប្រកួតដណ្តើមខ្សែក្រវាត់ ៦ ខ្សែ ក្នុងពេលតែមួយនៃមហាព្រឹត្តិការណ៍ Krud Kun Khmer របស់សង្វៀនប្រដាល់ ទទក បានបំបែកកំណត់ត្រា ដោយមានអ្នកតាមដានការប្រកួតសរុបចូល ៦ លាននាក់ ខណៈការប្រកួតប្រជែងពិតជាមានភាពទាក់ទាញ និងជក់ចិត្តខ្លាំង ដោយក្នុងនោះជើងខ្លាំង ព្រំ សំណាង និង ឡុង បេនលឿន សុទ្ធតែការពារខ្សែក្រវាត់បានសម្រេច ចំណែក ធន់ រិទ្ធី និង លន បញ្ញា បានបង្កើតភាពភ្ញាក់ផ្អើលយ៉ាងខ្លាំង ដោយបានផ្តួលកីឡាករបរទេសឲ្យសន្លប់ដូចគ្នា ប៉ុន្តែ ឃីម បូរ៉ា បានចាញ់ ពេជ្រ សម្បត្តិ ក្នុងការប្រកួតដាក់ខ្សែក្រវាត់។
ពិតណាស់ លោក ម៉ុល នី ដែលជាប្រធានផ្គូផ្គងរបស់សង្វៀនប្រដាល់ទទក បានទទួលស្គាល់ថា ការផ្សាយផ្ទាល់ សម្រាប់ការប្រកួតដ៏ធំមិនធ្លាប់មានកាលពីយប់ថ្ងៃទី៣ ខែកញ្ញា កន្លងទៅនេះ ពិតជាមានភាពរអាក់រអួលផ្នែកបច្ចេកទេសបន្តិចបន្តួច ដែលធ្វើឲ្យចំនួនអ្នកមើលពេលផ្សាយផ្ទាល់បានកើនឡើងត្រឹមជិត ៣០ម៉ឺននាក់ (ជិត300K) ប៉ុន្តែសម្រាប់ចំនួនអ្នកចូលមើលសរុប ក្រោយការប្រកួតបានបញ្ចប់ គឺមានរហូតដល់ ៦លាននាក់ឯណោះ។
លោក ម៉ុល នី ក៏បាននិយាយកាលពីម្សិលមិញថា៖ “បន្ថែមទៅលើការបំបែកកំណត់ត្រាពិភពលោក សម្រាប់ការរៀបចំឲ្យមានការប្រកួតដណ្តើមខ្សែក្រវាត់ចំនួន ៦ខ្សែ ក្នុងពេលតែ ១ នេះ គឺព្រឹត្តិការណ៍ Krud Kun Khmer របស់យើងបានបំបែកកំណត់ត្រាថ្មីមួយទៀត ដោយមានអ្នកចូលមើលសរុបក្រោយការប្រកួតចូល ៦លាននាក់ (6M) ហើយនេះជាចំនួនដ៏ច្រើន ដែលសង្វៀននៅស្រុកខ្មែរយើងមិនធ្លាប់មានក្នុងប្រវត្តិសាស្រ្តប្រដាល់”។
ហើយលោក ម៉ុល នី បានបញ្ជាក់ថា៖ “ការប្រកួតនៅព្រឹត្តិការណ៍ Krud Kun Khmer ពិតជាមានភាពស្វិតស្វាញខ្លាំង ដោយសារកីឡាករម្នាក់ៗបានប្រឹងប្រែងអស់ពីលទ្ធភាពក្នុងការស្វែងរកជ័យជម្នះ ហើយតាមរយៈភាពជោគជ័យទាំងអស់នេះ បានធ្វើឲ្យម្ចាស់ឧបត្ថម្ភរបស់យើងសប្បាយចិត្ត អ៊ីចឹងពិតណាស់ខាងគ្រុឌ និងទូរទស្សន៍ជាតិទទក នឹងរៀបចំឲ្យមានព្រឹត្តិការណ៍ធំបែបនេះ ជាបន្តទៀត”៕