អ្នកប្រមាញ់គុនខ្មែរ ៥ នាក់ នឹងត្រូវប្រកួតជាមួយ អ្នកពិឃាត មកពី ៤ ប្រទេសផ្សេងគ្នា នៅថ្ងៃអាទិត្យ នេះ
កីឡាករលំដាប់ជើងខ្លាំងរបស់កម្ពុជា ចំនួន ៥ នាក់ ក្នុងនោះរួមមាន៖ ធឿន ធារ៉ា ឈឿង ល្វៃ ឈុត សេរីវ៉ាន់ថង ពេជ្រ ប៊ុនសិដ្ឋ និង គោរម ច័ន្ទរាជ ត្រូវបានដាក់ឲ្យប្រកួតមិត្តភាពអន្តរជាតិនៅក្នុងព្រឹត្តិការណ៍ Kun Khmer Grand Champion នៅលើសង្វៀនថោន ជាមួយអ្នកប្រយុទ្ធមកពី ៤ ប្រទេសផ្សេងគ្នា នៅថ្ងៃអាទិត្យ ទី ១០ ខែកញ្ញា ឆ្នាំ២០៣។
ពិតណាស់ កីឡាករជើងខ្លាំងថ្មីដែលកំពុងល្បីឈ្មោះ គោរម ច័ន្ទរាជ នឹងត្រូវប្រកួតមុនគេជាមួយអ្នកប្រដាល់ថៃ Robert Sor.Mongkogarnchang ក្នុងទម្ងន់ ៥៤ គីឡូក្រាម បន្ទាប់មកកីឡាករវាយមិនដកថយ ពេជ្រ ប៊ុនសិដ្ឋ ត្រូវជួបជើងខ្លាំងរបស់ចិន Lan Shanteng ក្នុងទម្ងន់ ៥៧ គីឡូក្រាម ចំណែកម្ចាស់មេដាយមាសស៊ីហ្គេម ឈុត សេរីវ៉ាន់ថង ដែលបានបាត់មុខពីសង្វៀនប្រដាល់មួយរយៈមកនោះ នឹងត្រូវប្រកួតជាមួយកីឡាកររូម៉ានី Silviu Vites ក្នុងទម្ងន់ ៦០ គីឡូក្រាម រីឯម្ចាស់មេដាយមាសស៊ីហ្គេម ឈឿង ល្វៃ ត្រូវប្រឈមមុខជាមួយអ្នកប្រយុទ្ធរបស់ថៃ Tetchmai Chor Narongsak ក្នុងទម្ងន់ ៧២ គីឡូក្រាម ហើយជើងខ្លាំង ធឿន ធារ៉ា ត្រូវប៉ះជាមួយអ្នកប្រដាល់បេឡារុស Nikata Gerasismovich ក្នុងទម្ងន់ ៧២ គីឡូក្រាមផងដែរ។
យ៉ាងណាមិញ ចំពោះជើងខ្លាំងទាំង ៥នាក់របស់កម្ពុជានេះ ត្រូវបានម្ចាស់កម្មវិធីឲ្យឈ្មោះថា៖ ជា «អ្នកប្រមាញ់គុនខ្មែរ» ចំណែកកីឡាករបរទេសទាំង ៥នាក់វិញ ជា «អ្នកពិឃាត» ដោយការប្រកួតអន្តរជាតិទាំង ៥គូនេះ ធ្វើឡើងត្រឹម ៣ទឹកដូចគ្នា ហើយជាមួយគ្នានេះ លោក គឹម ស្រ៊ុនកុសល ទីប្រឹក្សាទូរទស្សន៍ថោនបានឲ្យដឹងថា៖ ការប្រកួតទាំង ៥ គូនេះ នឹងមានភាពទាក់ទាញ និងជក់ចិត្តខ្លាំងព្រោះបានសម្រិតសម្រាំងយកសុទ្ធតែកីឡាករ មានសមត្ថភាពល្អៗមកប្រកួតតែប៉ុណ្ណោះ។
គួរបញ្ជាក់ផងដែរថា ការប្រកួតអ្នកប្រមាញ់គុននខ្មែរក្នុងព្រឹត្តិការណ៍ Kun Khmer Grand Champion នៅលើសង្វៀនថោន គេនឹងធ្វើឡើងនៅថ្ងៃអាទិត្យ ទី១០ ខែកញ្ញា ឆ្នាំ២០៣ ហើយចាប់ផ្តើមពីម៉ោង ១១ៈ០០ ព្រឹកតទៅ៕