លោក Simon យល់ថា ការប៉ះគ្នារវាង វិសាខា និង ភ្នំពេញក្រោន ថ្ងៃនេះដូចជាសមរភូមិមួយ

នៅក្នុងសន្និសិទសារព័ត៍មានកាលពីម្សិលមិញមុនការប្រកួត រវាង វិសាខា និង ភ្នំពេញក្រោន មកដល់ គ្រូបង្វឹកលោក Simon Mcmenemy យល់ឃើញថា ជំនួបលើកនេះគឺជាការប្រកួតដ៏ពិបាកមួយដូចជាសមរភូមិ ព្រោះលោកគិតថា ភ្នំពេញក្រោន គឺជាក្រុមមួយដែលខ្លាំង ហើយធ្លាប់ធ្វើឲ្យពួកគេឈឺចាប់ម្ដងរួចមកហើយកាលពីប្រកួតពានរង្វាន់ Super Cup នាពេលកន្លងទៅ។

តាមការស្រង់សំដីរបស់លោក Simon Mcmenemy មុនការប្រកួតថ្ងៃនេះ

ការប្រកួតថ្ងៃនេះ ពិតណាស់គឺជាការប្រកួតមួយដ៏ធំ ដោយសារក្រុមធំៗពីរត្រូវជួបគ្នា ហើយបទពិសោធន៍ ដែលយើងចាញ់ពួកគាត់ ក្នុងពាន Super Cup កន្លងមក គឺជាការឈឺចាប់មួយ ដោយសារយើងបាត់បង់ការប្រមូលអារម្មណ៍ប្រមាណ ៧-៨នាទីចុងក្រោយ និងរបូតគ្រាប់បាល់ប៉េណាល់ទី ឥលូវខ្ញុំបានឲ្យក្រុមបំភ្លេចរឿងចាស់ចោល ហើយយើងនឹងប្រើបទពិសោធន៍ ដើម្បីលេងទល់ជាមួយពួកគាត់ ដែលជាក្រុមខ្លាំងមួយ និងដឹងពីរបៀបលេងដើម្បីឈ្នះ អ៊ីចឹងថ្ងៃស្អែក យើងនឹងប្រើប្រាស់អ្វីដែលយើងមាន ប្រើចំណុចខ្លាំងដែលយើងមាន ដើម្បីលេងជាមួយពួកគាត់ ការប្រកួតថ្ងៃស្អែកនេះ នឹងក្លាយជាការប្រកួតមួយដ៏លំបាក ប្រៀបដូចជាសមរភូមិមួយអញ្ចឹង។

គួរបញ្ជាក់ថា ក្រុម វិសាខា នឹងត្រូវប៉ះជាមួយ ភ្នំពេញក្រោន នៅម៉ោង ៦:០០ នាទីល្ងាចនេះ នៃពានរង្វាន់ ខេមបូឌានព្រីមៀរលីគ ឆ្នាំ២០២៣/២៤ សប្តាហ៍ទី៥៕