នោះៗ ពេលនេះ Thiago បានប្រកាសចង់សងសឹកឲ្យ ឈឿង ល្វៃ ទៅលើ សាមី
កីឡាករប្រេស៊ីលសញ្ជាតិខ្មែរ សែន ច័ន្ទឫទ្ធីគុន (Thiago Teixeira) បានប្រកាសសងសឹកឲ្យមិត្តរួមជាតិ ឈឿង ល្វៃ បន្ទាប់ពីត្រូវបានអ្នកលេងឆ្លងដែន សាមី បានឆាមេក វាយឲ្យសន្លប់ក្នុងទឹកទី១ កាលពីយប់មិញ ដោយជំនួបសងសឹករបស់ ឈឿង ល្វៃ លើកីឡាករថៃ សាមី កាលពីយប់មិញបានត្រឹមតែ ១ទឹកប៉ុណ្ណោះ ការពិតនៅលើសង្វៀនបង្ហាញថា ឈឿ ល្វៃ មានចំណុចខ្វះខាតច្រើនទាំងបច្ចេកទេស ភាពធន់ និងស្មារតី ផ្ទុយទៅវិញ កីឡាករថៃបានបង្ហាញកាន់តែខុសប្លែកជាងអ្វីដែលខ្លួនបានប្រកួតនៅទឹកដីកម្ពុជាពីមុនមក។
ពិតណាស់ គ្រាន់តែចាប់ផ្តើមទឹកទី ១ភ្លាម សាមី បានចាប់ផ្តើមវាយសម្រុកចូលតែម្តងតាមរយៈកណ្តាប់ដៃ និងទាត់ជើងក្រោមផ្ទួនៗ ដោយកណ្តាប់ដៃធ្ងន់ៗ និងទាត់ជើងក្រោមក៏ធ្ងន់បានជំរុញឲ្យអ្នកលេងគុនខ្មែរ ឈឿង ល្វៃ បាត់បង់បច្ចេកទេសក្នុងការទប់ទល់ ហើយព្យាយាមថយក្រោយ ហើយ ឈឿង ល្វៃ ត្រូវបានអាជ្ញាកណ្តាលរាប់ ៨លើកទី១ បន្ទាប់ពី សាមី វាយកណ្តាប់ដៃស្តាំចំមុខ បន្ទាប់មកកីឡាករថៃទាត់ជើងក្រោមឲ្យដួលត្រូវបានអាជ្ញាកណ្តាលរាប់ ៨ជាលើកទី២ ហើយលើកទី៣ សាមី វាយកណ្តាប់ដៃឆ្វេងត្រូវមុខពេញបណ្តាលឲ្យអាជ្ញាកកណ្តាលបញ្ឈប់ការប្រកួតតែម្តង។
តាមរយៈបរាជ័យនេះ កីឡាករប្រេស៊ីលសញ្ជាតិខ្មែរ សែន ច័ន្ទឫទ្ធីគុន ក៏បានប្រកាសថា៖ «ខ្ញុំនិងប្រកួតជាមួយ សាមី ដើម្បីសងសឹងឲ្យប្អូនប្រុសរបស់ខ្ញុំ ឈឿង ល្វៃ ដែលបានចាញ់»។
គួរបញ្ជាក់ផងដែរថា នេះជាបរាជ័យលើកទី ២ ហើយ របស់អ្នកលេងគុនខ្មែរ ឈឿង ល្វៃ ក្រោមកណ្តាប់ដៃ និងរន្ទះជើងរបស់ សាមី បានឆាមេក បន្ទាប់ពីលើកទី ១ កាលពីខែមេសា កាលនោះ ឈឿង ល្វៃ បានចាញ់ដោយសារខូចជើងក្រោម ហើយលើកទី ២ នេះ រឹតតែធ្ងន់ជាងលើកមុនទៀត ពីព្រោះតស៊ូបានត្រឹមតែ ១ ទឹកប៉ុណ្ណោះ និងធ្វើអ្វីមិនកើតទៅលើកីឡាករថៃសោះ៕