គ្រូប្រដាល់ម្នាក់ បានប្រាប់ថា កុំឲ្យតម្លៃកីឡាករថៃ សាមី ខ្លាំងពេក បន្ទាប់ពីឈ្នះ ឈឿង ល្វៃ
កីឡាករប្រដាល់គុនខ្មែរ និងអ្នកគាំទ្រមួយចំនួននៅមិនសុខស្រួលឡើយចំពោះកីឡាករថៃ សាមី បានចាមេក បន្ទាប់ពីរូបគេបានផ្តួលម្ចាស់មេដាយមាសស៊ីហ្គេម ឈឿង ល្វៃ ឲ្យសន្លប់ក្នុងទឹកទី១ កាលពីយប់ថ្ងៃអាទិត្យ ទី២៥ ខែមិថុនា ឆ្នាំ២០២៣ ក្នុងនោះ កីឡាករប្រេស៊ីលសញ្ជាតិខ្មែរ សែន ច័ន្ទឫទ្ធីគុន (Thiago Teixeira) បានប្រកាសចង់ជួប សាមី ដើម្បីសងសឹកឲ្យ ឈឿង ល្វៃ ហើយជាមួយគ្នានោះ ក៏ការលើកឡើងជាច្រើនអំពីកីឡាករគុនខ្មែរដែលអាចជួប សាមី ក្នុងនោះមានកីឡាករល្បីៗដូចជា រឿង សោភ័ណ្ឌ ព្រំ សំណាង ឡៅ ចន្ទ្រា ធឿន ធារ៉ា និង Thiago ជាដើមដែលសុទ្ធតែកីឡាករលំដាប់ A នៅកម្ពុជា។
ទោះបីជាយ៉ាងណាក៏ដោយ ការលើកឡើងបែបនេះត្រូវបាន លោក ជា រិទ្ធ គ្រូបង្ហាត់ប្រដាល់ម្នាក់បានបញ្ចេញទស្សនៈផ្ទាល់ខ្លួនថា៖ គ្រាន់តែកីឡាករធម្មតាម្នាក់របស់គេ ហេតុអីយើងចាំបាច់ប្រមូលកីឡាករកម្រិត A យើងទាំងអស់មកធ្វើអី? ចុះបើចាញ់ទាំងអស់ទៀត តើយើងគិតមិច? បើតាមគំនិតខ្ញុំកុំឲ្យតម្លៃគេពេក ចង់ឈ្នះគេពេក តែយើងកំពុងឲ្យតម្លៃមួយថៃហើយ ខ្ញុំគិតថាគេកំពុងសើចយើងហើយមើលទៅ នេះគ្រាន់តែ សាមី ម្នាក់ មកអុកឡុកគុនខ្មែរពេញប្រទេស ចុះទម្រាំតែលំដាប់ A គេទៀតនោះ តើយើងនៅណាក្នុងកែវភ្នែកពិភពលោក ហើយយើងកម្រិត A យើងឈ្នះកម្រិតខេត្តគេ ក៏មិនសូវមានន័យដែរ ដូច រឿង សោភ័ណ្ឌ គួរតែវាយជាមួយ សែនឆៃ បានស័ក្តិសម នេះគ្រាន់តែជាគំនិតរបស់ខ្ញុំមួយជ្រុងប៉ុណ្ណោះ សូមអរគុណ ខុសឬត្រូវសូមអភ័យទោស។
គួរបញ្ជាក់ថា កីឡាករថៃ សាមី កំពុងអុកឡុកពិភពប្រដាល់គុនខ្មែរ ដែលធ្វើឲ្យអ្នកគាំទ្រកម្ពុជាចង់ឃើញអ្នកលេងគុនខ្មែរបំបាក់កីឡាករថៃម្នាក់នេះ ចាប់តាំងពីមកប្រកួតនៅកម្ពុជា កាលពីឆ្នាំ២០២២ មក រូបគេប្រកួតចាញ់ ២ដងតែប៉ុណ្ណោះ ក្នុងនោះគឺចាញ់ ព្រំ សំណាង ដោយសន្លប់ និងចាញ់ពិន្ទុ ធឿន ធារ៉ា ប៉ុន្តែរូបគេបានផ្តួល ឡៅ ចន្ទ្រា ធន់ រិទ្ធី ឈឿង ល្វៃ ២ដង និងស្មើពិន្ទុជាមួយ ធឿន ធារ៉ា ១ដង៕