ក្លិបប្រដាល់គុនខ្មែរអាយុ ៣៦ឆ្នាំនៅអាមេរិកនិងប្តូរទីតាំងថ្មីហើយ
ក្លិបប្រដាល់គុនខ្មែរនៅទីក្រុងឡុងប៊ិច សហរដ្ឋអាមេរិក ឈ្មោះ «មជ្ឈមណ្ឌលខ្មែរឃីកបុកស៊ីងឡុងប៊ិច» និងត្រូវផ្លាស់ប្តូរទៅកាន់ទីតាំងថ្មី បន្ទាប់ពីបានបើកដំណើការអស់រយៈពេល ៣៦ឆ្នាំ ដោយតាមការផ្សាយរបស់សារព័ត៌មានមួយ បានឲ្យដឹងថា ក្លិបប្រដាល់គុនខ្មែរនេះស្ថិតនៅ Anaheim Street ដែលមានអង្គការ Long Beach Rescue Mission ជាម្ចាស់ ហើយអង្គការត្រូវការ ទីកន្លែងដើម្បីធ្វើជាទីជម្រកសម្រាប់អ្នកគ្មានផ្ទះសម្បែង។
បើតាមការឲ្យដឹងពីលោក រ៉ុន ស្មីត ម្ចាស់ក្លិបប្រដាល់គុនខ្មែរមួយនេះ ថា ការផ្លាស់ប្តូរទៅទីតាំងថ្មីប្រហែលជាថ្ងៃទី១ ខែសីហាខាងមុខនេះហើយ ដោយលោកបានហ្វឹកហាត់ប្រដាល់គុនខ្មែរតាមរយៈលោកគ្រូ អ៊ុំ រី ដូច្នេះលោកចង់ឲ្យមរតកគុនខ្មែរបន្តគង់វង្សយូរអង្វែង។
ពិតណាស់ លោកគ្រូ អ៊ុំ រី បានទៅដល់សហរដ្ឋអាមេរិក និងបានរស់នៅទីក្រុងឡុងប៊ិច ដោយបានបើកក្លិបប្រដាល់គុនខ្មែរមួយនេះ ដែលបានក្លាយជាសាលាបង្ហាត់ប្រដាល់ ឃីកបុកស៊ីង មានអាយុកាលចាស់ជាងគេបំផុតរបស់ជនជាតិអាស៊ាននៅរដ្ឋកាលីហ្វ័រញ៉ាខាងត្បូង ហើយក្នុងរយៈពេលជាច្រើនឆ្នាំកន្លងទៅនេះ «មជ្ឈមណ្ឌមខ្មែរឃីកបុកស៊ីងឡុងប៊ិច» បានបណ្តុះបណ្តាលកីឡាករ កីឡាការិនីប្រដាល់គុនខ្មែរ និងឃីកបុកស៊ីងជាច្រើន ដែលបានចេញទៅប្រកួតទូទាំងពិភពលោក។
គួរបញ្ជាក់ផងដែរថា ក្លិបនេះត្រូវបានបង្កើតឡើងកាលពីឆ្នាំ១៩៨៧ ដោយលោក អ៊ុំ រី ដែលជាជើងឯកគុនខ្មែរម្នាក់ ហើយកាលពីអាយុ ២៣ឆ្នាំ លោកបានក្លាយជាជើងឯកជាតិនៅប្រទេសកម្ពុជា និងរយៈពេល ១៥ឆ្នាំ លោកបានចេញទៅប្រកួតទូទាំងតំបន់អាស៊ាន ដែលមានស្ថិតិប្រកួតឈ្នះជាង ២៥០ដង កាលពីនៅឆ្នាំ១៩៧២ លោកបានឈ្នះជើងឯកអន្តរជាតិ និងមានជីវិតពីសម័យខ្មែរក្រហមឆ្នាំ១៩៧៥ ផងដែរ៕