កីឡាករបារាំង-ខ្មែរ ចាន់ សីហា ប្រាប់មូលហេតុក្នុងការវិលមកកាន់សង្វៀនជាថ្មីវិញ
អ្នកប្រដាល់បារាំង-ខ្មែរ ចាន់ សីហា បានវិលត្រឡប់មកកាន់សង្វៀនជាថ្មីហើយ បន្ទាប់ពីរូបគេបានខកខានឡើងសង្វៀនអស់រយៈពេលប្រហែលជា ៦ឆ្នាំ ពាក់ព័ន្ធនិងការវិលត្រឡប់មកកាន់សង្វៀនជាថ្មីនេះ រូបគេបានបញ្ជាក់ថា តម្លៃខ្លួននៃការប្រកួតគុនខ្មែរនាពេលបច្ចុប្បន្ននេះប្រសើរជាងមុន។
កីឡាករបារាំង-ខ្មែរ ចាន់ សីហា បាននិយាយថា៖ ការប្រកួតគុនខ្មែរឥឡូវនេះទទួលបានតម្លៃខ្លួនប្រសើរជាងមុន ម្យ៉ាងទៀត វាជាកីឡាដែលខ្ញុំចូលចិត្ត តែពិតមែនទៅ ខ្ញុំក៏ត្រូវការចំណូលដើម្បីចិញ្ចឹមគ្រួសាររបស់ខ្ញុំដែរ យើងឃើញហើយថា មួយរយៈពេលចុងក្រោយនេះ មានកីឡាករចាស់ៗជាច្រើនបានវិលមកប្រកួតវិញ ហើយខ្ញុំពិតជាស្រឡាញ់គុនខ្មែរ តែក៏ត្រូវការចំណូលដើម្បីផ្គត់ផ្គង់គ្រួសារ យ៉ាងណាខ្ញុំក៏ទទួលបានការគាំទ្រពីក្រុមគ្រួសារដែលជំរុញឲ្យខ្ញុំវិលមកកាន់សង្វៀនវិញផងដែរ នៅក្នុងរយៈពេលប៉ុន្មានឆ្នាំដែលខ្លួនបានឃ្លាតឆ្ងាយពីសង្វៀន ក៏ដោយសារមានគ្រួសារ និងមានកូនស្រីពីរនាក់ ដូច្នេះខ្ញុំចំណាយពេលវេលាដើម្បីមើលថែប្រពន្ធកូនរបស់ខ្ញុំ នេះហើយជាហេតុធ្វើឲ្យផ្អាកពីប្រដាល់ ទោះបីជាយ៉ាងណា នៅពេលកូនស្រីជាទីស្រឡាញ់ទាំងពីរអាយុកាន់តែច្រើនបានផ្តល់ឱកាសឲ្យខ្ញុំដកឃ្លាកមកហ្វឹកហាត់ប្រដាល់ឡើងវិញ។
គួបញ្ជាក់ថា កីឡាករប្រដាល់បារាំងសញ្ជាតិខ្មែរ ចាន់ សីហា និងត្រូវជួបកីឡាករ វៀតណាម ត្រាន មិញទ្រុង នាល្ងាចថ្ងៃអាទិត្យ ទី៩ ខែកក្កដា ឆ្នាំ២០២៣ នេះ នៅសង្វៀនបាយ័នស្ទឹងមានជ័យ ហើយកីឡាករសញ្ជាតិខ្មែររូបនេះ ធ្លាប់ប្រកួតបាន ២២ដង ក្នុងនោះឈ្នះ ២០ដង ចាញ់ ២ដង និងធ្លាប់ផ្តួលដៃគូឲ្យសន្លប់ ៨ដង ដោយការប្រកួតចុងក្រោយ របស់គាត់បានឈ្នះកីឡាករ ម៉ានូ សិល្បៈ នៅទឹកទី៥ ផងដែរ៕