ពេលនេះ សុខ ធី មិនទាន់បានមកខ្មែរទេ ពីព្រោះមិនទាន់បានតម្លៃខ្លួនប្រកួតនៅថៃ
ពេលនេះកីឡាករប្រដាល់គុនខ្មែរ សុខ ធី ហៅ កាកា នៅមិនទាន់ធ្វើដំណើរមកប្រទេសកម្ពុជានៅឡើយទេ ដោយសាររូបគេមិនទាន់ទទួលបានប្រាក់តម្លៃខ្លួន ពីការប្រកួតឈ្នះកីឡាករថៃ ផេតវិឆៃ នៅសង្វៀន Stool Super Fight 2 កាលពីសប្តាហ៍មុន បើតាមការគ្រោងទុក សុខ ធី និងធ្វើដំណើរមកប្រទេសកម្ពុជា បន្ទាប់ពីប្រកួតជាមួយកីឡាករថៃ ផេតវិឆៃ នៅថ្ងៃទី៥ ខែកក្កដា ឆ្នាំ២០២៣ ដើម្បីពិភាក្សាជាមួយឧកញ៉ា ស្រី ចាន់ថន ពីគម្រោងរស់នៅ និងប្រកបអាជីពប្រដាល់នៅប្រទេសកម្ពុជា។
សុខ ធី បាននិយាយថា៖ ខ្ញុំកំពុងរង់ចាំតែតម្លៃខ្លួនដែលវ៉ៃកាលពីថ្ងៃពុធ នៅថៃសិន ពេលបានលុយរួច ខ្ញុំនិងរៀបចំខោអាវ យកប្រពន្ធ និងកូន ទៅទឹកដីកម្ពុជា ដើម្បីទៅជួបជាមួយឧកញ៉ា ស្រី ចាន់ថន។
ពិតណាស់ គម្រោងដែលជួបជាមួយឧកញ៉ា ស្រី ចាន់ថន កើតឡើង បន្ទាប់ពីអាជីពប្រដាល់របស់ខ្លួននៅប្រទេសថៃមិនដំណើរការល្អ ដោយសារមិនត្រូវបានចាប់ឲ្យរូបគេឡើងប្រកួត ដែលធ្វើឲ្យបាត់ចំណូលក្នុងការចិញ្ចឹមប្រពន្ធ និងកូន ដូច្នេះហើយទើប សុខ ធី ចង់មកប្រកបអាជីពនៅប្រទេសកំណើតក្រែងបានប្រកួតញឹកញាប់ ដែលអាចរកចំណូលបានចិញ្ចឹមគ្រួសារ និងជាពិសេស ដើម្បីនាំប្រពន្ធជាជនជាតិថៃ និងកូនប្រុសអាយុជាង ២ឆ្នាំមករស់នៅប្រទេសកម្ពុជាតែម្តង។
គួរបញ្ជាក់ផងដែរថា រឿងរ៉ាវរបស់ សុខ ធី ដែលមិនបានឡើងប្រកួតញឹកញាប់ បានកើតមានឡើង បន្ទាប់ពីកីឡាប្រដាល់គុនខ្មែរ ត្រូវបានដាក់បញ្ចូលជាផ្លូវការក្នុងកីឡាស៊ីហ្គេម លើកទី៣២ ដែលប្រទេសកម្ពុជា ធ្វើជាម្ចាស់ផ្ទះ ហើយប្រសិនបើកីឡាករខ្មែររូបនេះឡើងប្រកួតទាល់តែប្រើ Muay Thai គឺមិនតំណាងឲ្យគុនខ្មែរនោះទេ ប៉ុន្តែ សុខ ធី មិនព្រម ទើបរូបគេមិនបានឡើងប្រកួតញឹកញាប់៕