ធឿន ធារ៉ា ប៉ះ កីឡាករ រ៉ូម៉ានី និងសន្យាធ្វើឲ្យកក្រើកនៅសង្វៀនជាថ្មីក្រោយជាពីរបួសដៃ

កីឡាករប្រដាល់មានដើមកំណើតមកពីខេត្តព្រៃវែង ធឿន ធារ៉ា បាននិយាយថា៖ ការវិលមកកាន់សង្វៀនជាថ្មីដោយសារបញ្ហារបួសរបស់ខ្លួនបានជាសះស្បើយមួយរយភាគរយហើយ មួយវិញទៀតការហ្វឹកហាត់របស់ខ្លួនបានពេញលេញល្អណាស់ ហើយមួយរយៈចុងក្រោយនេះ គឺខ្លួនបុកហាត់ខ្លាំងណាស់ ដើម្បីត្រៀមការប្រកួតដណ្តើមខ្សែក្រវាត់នៅថ្ងៃទី១៦ ខាងមុខនេះ ចំពោះម៉ាស៊ីនរបស់ខ្លួនមិនអាចនិយាយមុនបាននោះទេដោយសារខានប្រកួតយូរអាចគាំងក៏ថាបាន ហើយបច្ចុប្បន្នរូបគេបុកហាត់ខ្លះទៅលើកម្លាំងហ្ស៊ូស។

អ្នកលេងពូថៅដៃពិឃាត ធឿន ធារ៉ា បានបន្តទៀតថា៖ “សម្រាប់រូបខ្ញុំសង្ឃឹមថាថ្ងៃទី១៦ ខែកក្កដា នេះ និងធ្វើឲ្យបានល្អ មិនធ្វើឲ្យពុកម៉ែបងប្អូនខកចិត្តនោះទេក្នុងការវិលមកសារជាថ្មីនេះ”។

គួរបញ្ជាក់ថា ព្រឹត្តិការណ៍ប្រកួតកីឡាប្រដាល់គុនខ្មែរដណ្តើមខ្សែក្រវាត់ តេជោ សន្តិភាព គុនខ្មែរវើលឆេមពាន និងប្រព្រឹត្តទៅនៅថ្ងៃទី១៦ ខែកក្កដា ឆ្នាំ២០២៣ នៅសង្វៀនថោន ដោយមានកីឡាករជួរមុខកម្ពុជាជាច្រើនដូចជា៖​

គូដណ្តើមខ្សែក្រវាត់៖ ជាងកាត់សក់ដៃឯក ព្រំ សំណាង ទទួលកីឡាករមកពីបេឡារុស្ស NIKITA លើប្រភេទទម្ងន់ ៧៧គីឡូក្រាម អ្នកលេងពូថៅដៃពិឃាត ធឿន ធារ៉ា ត្រូវប៉ះជាមួយអ្នកលេងឆ្លងទ្វីប ALEX BUBLEA មកពីប្រទេស រ៉ូម៉ានី វាយលើប្រភេទទម្ងន់ ៧២គីឡូក្រាម រីឯគូមិត្តភាពពិសេស កណ្តាប់ដៃភ្លើងជើងរន្ទះ រឿង សោភ័ណ្ឌ ទទួលស្វាគមន៍មិត្តចាស់មកពីប្រទេសថៃ CHANGPUAK JESADA លើប្រភេទទម្ងន់ ៦៩គីឡូក្រាម និងមនុស្សយក្សមិនខ្លាចការប្រយុទ្ធ ម៉ានូ សិល្បៈ ជួបអ្នកប្រយុទ្ធមកពីឡាវ CHATSAKMAI CHATCHAWAM លើប្រភេទទម្ងន់ ៨៥គីឡូក្រាម។

គូមិត្តភាពបន្តបន្ទាប់រួមមាន៖ យ៉េន ឌីណា ជួបកីឡាកររុស្ស៊ី SOLOVEV SERGEI លើប្រភេទទម្ងន់ ៦៥គីឡូក្រាម ក្របីព្រៃ ពេជ្រ សម្បត្តិ ស្វាគមន៍ PETCHLAMPOON POR.CHAREONPAT មកពីប្រទេសថៃ លើប្រភេទទម្ងន់ ៦០គីឡូក្រាម និងដំរីក្លុកពិឃាត ផល សោភ័ណ្ឌ ទទួលកីឡាករមកពីព័រទុយហ្គាល់ MIGUEL TRINDADE លើប្រភេទទម្ងន់ ៦៥គីឡូក្រាម៕