អ្នកប្រដាល់គុនខ្មែរ សុខ ធី បានបញ្ជាក់ជុំវិញការនាំប្រពន្ធកូនមករស់នៅស្រុកខ្មែរ
អ្នកប្រដាល់គុនខ្មែរ សុខ ធី ហៅ កាកា បាននាំប្រពន្ធ និងកូនប្រុសអាយុប្រហែលជាង ២ឆ្នាំមករស់នៅប្រទេសកម្ពុជា បន្ទាប់ពីការរស់នៅប្រទេសថៃធ្វើឲ្យរូបគេមិនសូវបានឡើងប្រកួតញឹកញាប់ ដោយអ្នកប្រដាល់ សុខ ធី បាននិយាយថា៖ “បាទ ពេលនេះ ខ្ញុំ និងប្រពន្ធកូនមករស់នៅស្រុកខ្មែរហើយ គ្រួសារខ្ញុំអាចរស់នៅកម្ពុជាយូរអង្វែង”។
ពិតណាស់ ដោយសារការរស់នៅក្នុងប្រទេសកម្ពុជាមិនសូវមានអ្នកនិយាយភាសាថៃច្រើនដែលជាកត្តាធ្វើឲ្យមានការលំបាកដល់ភរិយារបស់ខ្លួន ប៉ុន្តែប្រពន្ធខ្ញុំបាននិយាយថា៖ “អត់អីទេ អាចរស់នៅខ្មែរបាន គ្រាន់តែគាត់ពិបាកបន្តិចដោយសារអត់មានអ្នកនិយាយថៃជាមួយគាត់ មានតែខ្ញុំនិយាយថៃជាមួយគាត់ប៉ុណ្ណោះ”។
យ៉ាងណាមិញ បន្ទាប់ពីមកស្នាក់នៅប្រទេសកម្ពុជា បានប៉ុន្មានថ្ងៃ សុខ ធី ប្រកាសពីការចង់ឡើងសង្វៀនដែលអាចជួបជើងខ្លាំងគុនខ្មែរលំដាប់ទម្ងន់ ៦០គីឡូក្រាម ហើយកាលពីម្សិលនិញនេះ អ្នកលេងចិត្តសឿង អេលីត សាន់ បានបង្ហោះសារចង់សាកក្បាច់គុនជាមួយរៀមច្បង សុខ ធី ខណៈលោក ស៊ន អេលីត ជាគ្រូបង្វឹកក៏សង្ឃឹមគូនេះជួបគ្នាឆាប់ៗ ស្របពេលជាមួយគ្នានេះ លោកគ្រូ ពេជ្រ សុផាន់ ហាក់ដូចជាចង់ឲ្យជួបកូនសិស្សរបស់លោកគឺក្របីព្រៃ ពេជ្រ សម្បត្តិ។
គួរបញ្ជាក់ថា អ្នកលេងគុនខ្មែរ សុខ ធី ហៅ កាកា បានមកប្រកបអាជីពប្រដាល់នៅប្រទេសកម្ពុជា និងនាំប្រពន្ធកូនមកស្នាក់នៅកម្ពុជាជាមួយផង តាមរយៈការជួយជ្រោមជ្រែងរបស់ឧកញ៉ា ស្រី ចាន់ថន ដែលមានក្លិបប្រដាល់ទំនើបលំដាប់អន្តរជាតិ និងជាអនុប្រធានសហព័ន្ធកីឡាប្រដាល់គុនខ្មែរផងដែរ៕