លោកបែ មករា និយាយពី សៀង ចន្ធា ចេញទៅប្រកបអាជីពនៅលីគកាតា
អគ្គលេខាធិការក្រុមបឹងកេត សង្ឃឹមថាយុវជនទាំងឡាយដែលកំពុងហាត់បាល់ទាត់ទាំងអស់នឹងកាន់តែមានភាពក្លាហានក្នុងការស្រមៃឲ្យធំ ដាក់គោលដៅឲ្យខ្ពស់ ដែលជាកម្លាំងចិត្តនៅក្នុងការប្រឹងប្រែងរបស់ពួកគេ និងមានកីឡាករខ្មែរគំរូល្អកម្រិតខ្ពស់សម្រាប់ពួកគេខិតខំតាម ។
លោកបែ មករាបានបង្ហោះក្នុងគណនី FACEBOOK លោកថា ឥឡូវនេះ សៀង ចន្ធា ជាកីឡាករកម្ពុជាដំបូងបង្អស់ដែលបានទៅលេងនៅលីគក្នុងប្រទេសកាតា ខណៈនៅរង់ចាំការធ្វើតេស្តសុខភាពមួយដំណាក់កាលទៀត នៅពេលតេស្តសុខភាពជោគជ័យ ចន្ធា នឹងបានហាត់ជាមួយកីឡាករល្អៗ គ្រូបង្វឹកពូកែៗ លេងទល់នឹងក្រុមខ្លាំងៗ ហើយនេះជាជំហានមួយក្នុងការអភិវឌ្ឍខ្លួនបន្ថែមទៀតដែលអាចធ្វើឲ្យគេឡើងកម្រិតទៅលេងនៅលីគកាន់តែខ្ពស់និងកាន់តែធំ ជាចុងក្រោយលោកបានលើកឡើងថា ប្រសិនអ្វីៗជោគជ័យ ខ្ញុំសង្ឃឹមថាយុវជនទាំងឡាយដែលកំពុងហាត់បាល់ទាត់នឹងកាន់តែមានភាពក្លាហានក្នុងការស្រមៃឲ្យធំ សំដៅឲ្យខ្ពស់ ដែលជាកម្លាំងចិត្តនៅក្នុងការប្រឹងប្រែងរបស់ពួកគេ និងមានកីឡាករខ្មែរគំរូល្អកម្រិតខ្ពស់សម្រាប់ពួកគេខិតខំតាម សូមជូនពរឲ្យ ចន្ធា ទទួលបានជោគជ័យនៅក្នុងបេសកកម្មថ្មីនិងធំមួយនេះ ។
គួរបញ្ជាក់ផងដែរថា កន្លងមកក្លិប បឹងកេត បានអនុញ្ញាតឲ្យកីឡាករ ចាន់ វឌ្ឍនាកា បានទៅលេងនៅក្លិប Fujieda MYFC ដែលស្ថិតនៅលីគលំដាប់ទី៣ របស់ប្រទេសជប៉ុនដែលពេលនោះកីឡាករបាល់ទាត់រូបនេះកំពុងឡើងជើងខ្លាំងចន្លោះឆ្នាំ២០១៧៕
