ក្រោយផ្លាស់ទៅក្លិបប្រដាល់គុនខ្មែរ «មេសថ្ងក» មឿន សុខហ៊ុច នឹងប្តេជ្ញាស្តាកេរ្តិ៍ឈ្មោះឡើងវិញ
កីឡាករប្រដាល់គុនខ្មែរចាស់វស្សា មឿន សុខហ៊ុច ជឿជាក់លើសមត្ថភាពរបស់ខ្លួនថានឹងស្តាកេត្តិយសកេរ្តិ៍ឈ្មោះឡើងវិញ ក្រោយផ្លាស់ប្តូរពីក្លិបប្រដាល់កងនាយកដ្ឋានអង្គរក្ស ទៅកាន់ក្លិបប្រដាល់ មេសថ្ងក ខេត្តស្វាយរៀង សុខហ៊ុច ជឿជាក់ បែបនេះដោយសារគាត់ទទួលការបង្វឹកពីលោកគ្រូ បឺត ខាំ។
កាលពីថ្ងៃទី២៥ ខែកក្កដា ឆ្នាំ២០២៣ មឿន សុខហ៊ុច និយាយថា៖ “ខ្ញុំនឹងខិតខំប្រឹងប្រែងហ្វឹកហាត់បន្តទៀត ដើម្បីយកកេរ្តិ៍ឈ្មោះ និងកេត្តិយសមកឲ្យដូចមុនវិញ ទាំងសុខភាព និងកម្លាំងរបស់ខ្លួនគឺនៅមាំមួន និងធន់ល្អ អាចប្រកួតបាន ៤ទៅ៥ ឆ្នាំទៀត ការផ្លាស់ប្តូរមកកាន់ក្លិបប្រដាល់ថ្មី (មេសថ្ងក ខេត្តស្វាយរៀង) អ្នកលេងរន្ទះជើងពិឃាដ មឿន សុខហ៊ុច មើលឃើញថា ការដឹកនាំរបស់ថ្នាក់ដឹកនាំ និងគ្រូបង្វឹកល្អ ជាហេតុនាំឲ្យខ្លួនសម្រេចចិត្តទៅកាន់ទ្រនំថ្មី។
ពិតណាស់ សុខហ៊ុច មកចូលរួមហ្វឹកហាត់នៅក្លិបថ្មីទើបតែបានមួយសប្តាហ៍ គាត់មើលឃើញពីភាពខុសប្លែកគ្នាអំពីបច្ចេកទេសបង្ហាត់របស់គ្រូបង្វឹកតាមក្លិបនីមួយៗដែលខ្លួនធ្លាប់ហ្វឹកហាត់ ដោយកីឡាករវ័យ ៣២ឆ្នាំរូបនេះ បញ្ជាក់ថា៖ ការបង្ហាត់របស់លោកគ្រូ បឺត ខាំ មានភាពវៃឆ្លាត ក្នុងការប្រើបញ្ញា ជាងកម្លាំងបាយ ហ្វឹកហាត់ជាមួយលោកគ្រូ បឺត ខាំង សុខហ៊ុច ជឿថា ខ្លួនអាចនឹងផ្លាស់ប្តូរច្រើន។
