អស្ចារ្យណាស់! សហព័ន្ធកីឡាប្រដាល់គុនខ្មែរអន្ដរជាតិ នឹងរៀបចំកម្មវិធីប្រកួតប្រដាល់ Kun Khmer World Championship ២០២៣ នាចុងឆ្នាំនេះ
ដើម្បីអមអរសាទរពិធីបុណ្យសមុទ្រ ដែលធ្វើឡើងនៅចុងឆ្នាំ២០២៣ នេះ សហព័ន្ធកីឡាប្រដាល់គុនខ្មែរអន្ដរជាតិ បានគ្រោងរៀបចំកម្មវិធីប្រកួតកីឡាប្រដាល់គុនខ្មែរវើលឆាមពាន ឆ្នាំ២០២៣ ( KUN KHMER WORLD CHAMPIOSHIP) ដែលនឹងប្រព្រឹត្តនៅខេត្តកែប។
លោកបណ្ឌិត មៀម រ៉ា ប្រធានសហព័ន្ធកីឡាប្រដាល់គុនខ្មែរអន្ដរជាតិ បានឲ្យដឹងថា៖ នេះជាកម្មវិធីប្រដាល់ប្រចាំឆ្នាំរបស់សហព័ន្ធកីឡាប្រដាល់គុនខ្មែរអន្ដរជាតិ ដែលធ្វើព្រមគ្នាក្នុងពេលតែមួយកម្មវិធីបុណ្យសមុទ្រ នៅខេត្តកែបនាចុងឆ្នាំនេះ ប៉ុន្តែមិនទាន់កំណត់ថ្ងៃណាពិតប្រាកដនៅឡើយទេ។
លោកបាននិយាយទៀតថា៖ យើងមិនទាន់កំណត់ថ្ងៃប្រកួតថ្ងៃណាទេ ដោយយើងរង់ចាំក្រសួងទេសចរណ៍ គាត់ឲ្យថ្ងៃពិតប្រាកដមកសិន ហើយយើងធ្វើប្រហែលពី ៣ទៅ៥ ថ្ងៃប៉ុណ្ណោះ ព្រោះតែក្រសួងវប្បធម៌ឲ្យយោបល់មក ត្រូវធ្វើកម្មវិធីនេះឲ្យធំជាងប្រទេសជិតខាងយើង ប៉ុន្តែយើងចាំមើលលទ្ធភាពសិន ថាយើងគួរធ្វើ ៣ ឬ៥ថ្ងៃ ហើយការរៀបចំព្រឹត្តិការណ៍អន្ដរជាតិនេះ នឹងបង្ហាញអំពីក្បាច់គុនបុរាណខ្មែរទៅកាន់ពិភពលោកឲ្យបានស្គាល់ពីក្បាច់គុនរបស់ខ្មែរ ខណៈបច្ចុប្បន្នមានប្រទេសចំនួន ៥០ ជាសមាជិកនៃសហព័ន្ធកីឡាប្រដាល់គុនខ្មែរអន្ដរជាតិ។
ពិតណាស់ នៅក្នុងព្រឹត្តិការណ៍នោះ ពួកយើងពុំទាន់ដឹងថា មានការប្រកួតដណ្តើមខ្សែក្រវាត់កម្រិតអន្តរជាតិ ឬអត់ទេ? ហើយលោកបណ្ឌិត មៀម រ៉ា ក៏បានអះអាងថា៖ “ឥឡូវនេះ យើងកំពុងពិភាក្សាគ្នា តែយ៉ាងណាខ្ញុំរំពឹងថា កម្មវិធីនេះ នឹងមានការដណ្តើមខ្សែក្រវាត់ ហើយកីឡាករបរទេសដែលយកមកប្រកួតនៅក្នុងកម្មវិធីនេះ មិនទាន់ដឹងថា យើងយកមកពីប្រទេសណាខ្លះនោះទេ ព្រោះយើងមានសមាជិកសហព័ន្ធដល់ទៅជាង ៥០ ប្រទេសទៅហើយ បើយើងយកមួយប្រទេសមក ២ ឬ៣ វាច្រើន អ៊ីចឹងខ្លាចយើងរៀបចំអត់ទាន់ តែយ៉ាងណាខ្ញុំនឹងព្យាយាមឲ្យអស់ពីលទ្ធភាព”។
គួរបញ្ជាក់ថា កម្មវិធីប្រកួតកីឡាប្រដាល់គុនខ្មែរ វើលឆាមពាន ឆ្នាំ២០២៣ (Kun Khmer World Championship 2023) ដែលរៀបចំដោយសហព័ន្ធកីឡាប្រដាល់គុនខ្មែរអន្ដរជាតិ មានការគាំទ្រដោយ ក្រសួងទេសចរណ៍ ក្រសួងវប្បធម៌ វិចិត្រ និងសិល្បៈ ក្រសួងអប់រំ យុវជន និងកីឡា និងគណៈកម្មការជាតិអូឡាំពិក ផងដែរ៕