WOW! អ្នកលេងគុនខ្មែរ ១០រូប ទទួលបានជោគជ័យខ្លាំងនាដើមឆ្នាំ២០២៣ នេះ
កីឡាករប្រដាល់គុនខ្មែរជាច្រើនទទួលបានជោគជ័យក្នុងអាជីពរបស់ខ្លួនទាំងការប្រកួតនៅក្លិប និងជម្រើសជាតិ កីឡាករខ្លះបានឈ្នះទាំងមេដាយមាសកីឡាស៊ីហ្គេម និងខ្សែក្រវាត់អន្តរជាតិ ខណៈអ្នកខ្លះទៀតបានឈ្នះខ្សែក្រវាត់អន្តរជាតិ ប៉ុន្តែមិនបានជាប់ជម្រើសជាតិនោះទេ។
ថ្ងៃនេះ សូមបង្ហាញកីឡាករ ១០រូប ដែលអាចចាត់ទុកថា ទទួលបានជោគជ័យខ្លាំងនៅក្នុងអាជីពប្រដាល់របស់ខ្លួននៅដើមឆ្នាំ២០២៣ នេះ៖
១. ព្រំ សំណាង រូបគេជាកីឡាករទម្ងន់ធ្ងន់មិនធ្លាប់ចាញ់សោះសម្រាប់ការប្រកួត ៣០លើកចុងក្រោយ គិតចាប់តាំងពីដាច់ឆ្នាំ២០២២ រហូតដល់ខែកក្កដា ឆ្នាំ២០២៣ នេះ ក្នុងនាមជាកីឡាករគុនខ្មែរជម្រើសជាតិ រូបគេបានឈ្នះមេដាយមាសស៊ីហ្គេម និងខ្សែក្រវាត់ ៤គ្រឿង ក្នុងនោះមានដូចជា ខ្សែក្រវាត់គុនខ្មែរអន្តរជាតិ KIF ខ្សែក្រវាត់អន្តរជាតិ Thai Fight ខ្សែក្រវាត់គ្រុឌគុនខ្មែរអន្តរជាតិ ខ្សែក្រវាត់គុនខ្មែរពិភពលោក តេជោសន្តិភាព និងឈ្នះ មេដាយមាសស៊ីហ្គេម ឆ្នាំ២០២៣ ។
២. ធឿន ធារ៉ា រូបគេមិនបានជាប់ជម្រើសជម្រើសជាតិកម្ពុជាទេ ប៉ុន្តែជាកីឡាករប្រដាល់ម្នាក់ដែលទទួលបានជោគជ័យបំផុតលើឆាកអន្តរជាតិ ដោយគ្រាន់តែប៉ុន្មានខែចុងក្រោយនេះ រូបគេបានឈ្នះខ្សែក្រវាត់អន្តរជាតិ ៤គ្រឿង ក្នុងនោះមានដូចជា ឈ្នះខ្សែក្រវាត់អន្តរជាតិ Thai Fight ឈ្នះខ្សែក្រវាត់គុនខ្មែរអន្តរជាតិ IPCC Kun Khmer ខ្សែក្រវាត់ គ្រុឌគុនខ្មែរអន្តរជាតិ ឈ្នះខ្សែក្រវាត់គុនខ្មែរពិភពលោក តេជោសន្តិភាព។
៣. ប៉ឹត សង្ឃឹម កីឡាករគុនខ្មែរ ប៉ឹត សង្ឃឹម មិនទាន់ស្គាល់ពាក្យបរាជ័យនៅឡើយទេ ក្នុងការឡើងសង្វៀនប្រហែលជាពីរឆ្នាំចុងក្រោយនេះ និងអាចចាត់ទុកជាកីឡាករទទួលបានជោគជ័យបំផុត រូបគេបានឈ្នះមេដាយមាសស៊ីហ្គេម ២រដូវកាលជាប់ៗគ្នា និងឈ្នះខ្សែក្រវាត់ជាច្រើនគ្រឿង សម្រាប់ឆ្នាំ២០២៣ នេះ រូបគេមិនសូវបានឡើងប្រកួតទេ ដោយបានហ្វឹកហាត់នៅជម្រើសជាតិ រូបគេបានខ្សែក្រវាត់គុនខ្មែរ IPCC Kun Khmer និងមេដាយមាសស៊ីហ្គេម ឆ្នាំ២០២៣។
៤. ឈុត សេរីវ៉ាន់ថង កីឡាករមកពីខេត្តបាត់ដំបងរូបនេះ ក៏ទទួលបានជោគជ័យខ្លាំងនៅដើមឆ្នាំ២០២៣ នេះ ដោយរូបគេបានឈ្នះមេដាយមាសស៊ីហ្គេម ឆ្នាំ២០២៣ និងខ្សែក្រវាត់ NNP។
៥. ឃីម បូរ៉ា កូនប្រុសរបស់លោក ហេង ប៊ុនឃីម ក៏ជាកីឡាករទទួលបានជោគជ័យច្រើនក្នុងអាជីពប្រដាល់របស់ខ្លួននាប៉ុន្មានឆ្នាំចុងក្រោយនេះ សម្រាប់ឆ្នាំ២០២៣ រូបគេបានឈ្នះមេដាយមាសស៊ីហ្គេម និងខ្សែក្រវាត់គ្រុឌអន្តរជាតិផងដែរ។
៦. ពេជ្រ សម្បត្តិ កីឡាកររូបនេះមិនមែនជាសមាជិកជម្រើសជាតិទេ ដូច្នេះរូបគេទទួលបានជោគជ័យសម្រាប់ក្លិប បន្ទាប់ពីឈ្នះខ្សែក្រវាត់ខារ៉ាបាវ កាលពីចុងឆ្នាំ២០២២ រូបគេបានឈ្នះខ្សែក្រវាត់គ្រុឌអន្តរជាតិ ឆ្នាំ២០២៣ និងឈ្នះពានរង្វាន់នៅប្រទេសបារាំងទៀតផង។
៧. ពេជ្រ ប៊ុនសិទ្ធ កូនសិស្សរបស់លោកគ្រូ ពេជ្រ សុផាន់ មិនមែនជាកីឡាករជម្រើសជាតិកម្ពុជាទេ ប៉ុន្តែបានឈ្នះខ្សែក្រវាត់អន្តរជាតិ ១គ្រឿងលើកដំបូងក្នុងអាជីពរបស់ខ្លួន រូបគេក៏បានឈ្នះខ្សែក្រវាត់ខារ៉ាបាវអន្តរជាតិឆ្នាំ២០២៣ នេះ។
៨. រឿង សោភ័ណ្ឌ កីឡាករ រឿង សោភ័ណ្ឌ ទើបតែវិលត្រឡប់ចូលសង្វៀនប្រហែលជាពីរឆ្នាំចុងក្រោយ និងបានជាប់ជម្រើសជាតិគុនខ្មែរ បន្ទាប់ពីឃ្លាតឆ្ងាយពីសង្វៀនជាច្រើនឆ្នាំដោយសារបង្ហាញរបួស ប៉ុន្តែរូបគេកម្របរាជ័យណាស់ក្នុងការប្រកួត ជាពិសេស ការប្រកួតចុងក្រោយ រូបគេបានឈ្នះដៃគូកាលពី ១០ឆ្នាំមុន ចេស្តា របស់ថៃ រូបគេក៏បានឈ្នះមេដាយមាសស៊ីហ្គេមឆ្នាំ២០២៣ ។
៩. ផល សោភ័ណ្ឌ កូនសិស្សនៅក្លិបតាឡីដំរីមានឬទ្ធិរូបនេះ រក្សាសមត្ថភាពបានល្អណាស់ បើប្រៀបធៀបនឹងកាលពី ៥ឆ្នាំមុន រូបគេមិនបានជាប់ជម្រើសជាតិទេ ប៉ុន្តែការប្រកួតនៅក្លិប រូបគេបានឈ្នះខ្សែក្រវាត់អន្តរជាតិ ១គ្រឿងនៅឆ្នាំ២០២៣ ហើយមិនបានប៉ុន្មានរូបគេបានឈ្នះខ្សែក្រវាត់គ្រុឌគុនខ្មែរអន្តរជាតិ បន្ថែមទៀត។
១០. លន បញ្ញា អ្នកប្រដាល់រូបនេះអាចត្រូវបានចាត់ទុកជាកីឡាករដែលទទួលបានជោគជ័យម្នាក់សម្រាប់អាជីពប្រដាល់របស់ខ្លួនក្នុងឆ្នាំ២០២៣នេះ ថ្វីបើរូបគេមិនបានប្រកួតដណ្តើមខ្សែក្រវាត់ណាមួយក៏ដោយ ប៉ុន្តែបើនិយាយពីការឡើងសង្វៀនប៉ុន្មានខែចុងក្រោយនេះ គេមិនដែលចាញ់ឡើយ ជាពិសេសរូបគេបានឈ្នះមេដាយមាសស៊ីហ្គេម ឆ្នាំ២០២៣ ទៀត៕