ប្រកួតក្រៅស្រុកពីរលើកចុងក្រោយរបស់ ផល សោភ័ណ្ឌ សុទ្ធតែចាញ់លឿនស្មានមិនដល់
អ្នកលេងគុនខ្មែរ ផល សោភ័ណ្ឌ បានបរាជ័យក្រោមរន្ទះជើងកីឡាករម្ចាស់ផ្ទះរុស្ស៊ី Kamran Nabati នៅដើមទឹកទី១ នៅកម្មវិធី RCC Fair Fight 22 នៅទីក្រុងមូស្គូ ប្រទេសរុស្ស៊ី ដោយជំនួបដែលអ្នកគាំទ្រទន្ទឹងរង់ចាំអស់រយៈពេលជាយូរមកហើយ បានប្រព្រឹត្តទៅត្រឹមតែ ១ៈ១៣ នាទីប៉ុណ្ណោះ ក៏ត្រូវបានបញ្ចប់ បន្ទាប់ពីកីឡាករ Nabati ប្រើជើងទាត់នាគវាត់កន្ទយចំមុខរបស់ ផល សោភ័ណ្ឌ បណ្តាលឲ្យសន្លប់តែម្តង។
ពិតណាស់ តាមបទពិសោធឡើងសង្វៀនរាប់ឆ្នាំ និងឆ្លងកាត់ដៃគូរាប់ភ្លេច ផល សោភ័ណ្ឌ គួរតែបានតតាំង និងបញ្ចេញសមត្ថភាពអស់ បើទោះបីជាចាញ់ ឬឈ្នះយ៉ាងណាក៏ដោយ ប៉ុន្តែបែរជាបញ្ចប់ទៅយ៉ាងលឿនហួសពីការគិត និងជារឿងគួរឲ្យសោកស្តាយបំផុតដល់អ្នកគាំទ្រ។
យ៉ាងណាមិញ លទ្ធផលនេះមិនខុសអ្វីកាលពីឆ្នាំ២០១៥ ឡើយ ដោយ ផល សោភ័ណ្ឌ បានទៅប្រកួតនៅកម្មវិធីធំ Thai Fight ជាមួយជើងខ្លាំងថៃ Saenchai ប៉ុន្តែការប្រកួតបានត្រឹមតែប៉ុន្មានវិនាទីប៉ុណ្ណោះក៏កីឡាករថៃប្រើកណ្តាប់ដៃផ្តួលអ្នកលេងគុនខ្មែរឲ្យសន្លប់យ៉ាងលឿន។
គួរបញ្ជាក់ផងដែរថា ដំរីភ្លុកពិឃាដ ផល សោភ័ណ្ឌ ចាញ់លើកទី១ គឺចាញ់ជើងខ្លាំងថៃ Saenchai ដោយកណ្តាប់ដៃនៅប៉ុន្មានវិនាទី នៃទឹកទី១ ក្នុងកម្មវិធីធំ Thai Fight កាលពីឆ្នាំ២០១៥ និងចាញ់លើក២ គឺចាញ់ជើងខ្លាំងរុស្ស៊ី Kamran Nabati នៅដើមទឹកទី១ នៅកម្មវិធី RCC Fair Fight 22 នៅទីក្រុងមូស្គូ ប្រទេសរុស្ស៊ី កាលពីយប់ថ្ងៃទី១៨ ខែសីហា ឆ្នាំ២០២៣ កន្លងទៅ៕