កីឡាករ Nabati ដែលផ្ដួល ផល សោភ័ណ្ឌ ទាមទារតម្លៃខ្លួន ៥មុឺន បើកីឡាករគុនខ្មែរណាចង់សងសឹកលើរូបគេ (មានវិដេអូ)
ជើងខ្លាំងរុស្ស៊ី Nabati Kamran បានទាមទារតម្លៃខ្លួនប្រមាណ ៥ម៉ឺនដុល្លារអាមេរិក ទើបយល់ព្រមប្រកួតជាមួយកីឡាករគុនខ្មែរដែលចង់សងសឹកឲ្យកីឡាករ ផល សោភ័ណ្ឌ ដែលសន្លប់កាលពីថ្ងៃទី១៨ ខែសីហា ឆ្នាំ២០២៣ កន្លងទៅ។
ពិតណាស់ បន្ទាប់ពីផ្តួល ផល សោភ័ណ្ឌ ឲ្យសន្លប់ក្នុងទឹកទី១ តាមរយៈរន្ទះជើងផ្កាប់ចាន អ្នកគាំទ្រគុនខ្មែរ ចំនួនចង់ឲ្យកីឡាកររុស្ស៊ី Nabati មកប្រកួតនៅប្រទេសកម្ពុជា ដើម្បីឲ្យ ផល សោភ័ណ្ឌ សងសឹក ឬក៏កីឡាករគុនខ្មែរផ្សេងទៀតសងសឹក ជាពិសេស លោក អេ ភូថង ក៏ចង់ឲ្យកូនប្រុសរបស់លោក គឺកីឡាករ អេ អាំម៉ារីន ភូថង ប្រកួតជាមួយជើងខ្លាំងរុស្ស៊ី Nabati ដែរ។
យ៉ាងណាមិញ បើតាមការឆ្លើយតបទៅនឹងការចង់ឲ្យមានកីឡាករគុនខ្មែរសងសឹកនោះ ប្រដាល់រុស្ស៊ី Nabati បាននិយាយថា៖ “ខ្ញុំគោរពចំពោះជើងឯកគុនខ្មែរម្នាក់នេះ កីឡាករកម្ពុជាចង់បង្កើនលុយ ហើយពួកគេចង់ឲ្យមានការប្រកួតគុនខ្មែរ ខ្ញុំមិនចាប់អារម្មណ៍ទេ ប៉ុន្តែប្រសិនបើ ពួកគាត់ពិតជាចង់បានមែន ខ្ញុំគិតថា យកល្អគឺបង្កើនតម្លៃខ្ញុំវិញ តើគិតយ៉ាងម៉េចដែរចំណុចនេះ?”។
លោកបានបន្តទៀតថា៖ “សួស្តីកម្ពុជា ខ្ញុំបានលឺថាអ្នកមានកីឡាករចង់ប្រកួតជាមួយខ្ញុំបន្ទាប់ ទទួលបាន ខ្ញុំត្រៀមខ្លួនរួចហើយ ប៉ុន្តែអ្នកត្រូវឲ្យតម្លៃខ្លួនខ្ញុំ ៥ម៉ឺនដុល្លារអាមេរិក”។
គួរបញ្ជាក់ផងដែរថា កាលពីថ្ងៃទី១៨ ខែសីហា ឆ្នាំ២០២៣ ជើងឯកគុនខ្មែរ ផល សោភ័ណ្ឌ បានបរាជ័យក្រោមរន្ទះជើងរបស់ម្ចាស់ផ្ទះរុស្ស៊ី Kamran Nabati នៅដើមទឹកទី១ នៅកម្មវិធី RCC Fair Fight 22 នៅទីក្រុងមូស្គូ ប្រទេសរុស្ស៊ី៕