អ្នកលេងថ្នាលគុនខ្មែរ រិទ្ធី បូរិន បង្ហាញមហិច្ឆតាចង់ក្លាយជាអ្នកល្បី ក្រោយមានការគាំទ្រខ្លាំងពីទស្សនិកជន
ពន្លកគុនខ្មែរ រិទ្ធី បូរិន បានបង្ហាញភាពខ្លាំងរបស់ខ្លួន ក្នុងការចាប់យកអាជីពជាអ្នកប្រដាល់ ហើយរូបគេបានបង្ហាញមហិច្ឆតាខ្ពស់ ក្នុងការអភិវឌ្ឍសមត្ថភាពខ្លួនឯង ដើម្បីឲ្យក្លាយជាអ្នកប្រដាល់គុនខ្មែរល្បីឈ្មោះម្នាក់ ទៅថ្ងៃអនាគត បន្ទាប់ពី បូរិន ទទួលបានការគាំទ្រកាន់តែច្រើនពីទស្សនិកជន។
ពិតណាស់ ដោយសារការស្រឡាញ់ និងចូលចិត្តការហាត់គុនខ្មែរ រិទ្ធី បូរិន បានជម្នះការហាមឃាត់របស់ឪពុកម្តាយ ដោយបានលួចទៅហាត់ប្រដាល់តាំងពីអាយុ ១១ឆ្នាំ ហើយ បូរិន អាចអភិវឌ្ឍសមត្ថភាពបានយ៉ាងលឿន ដើម្បីឡើងប្រកួតនៅលើសង្វៀន ដោយក្នុងរយៈពេលចូល ៣ឆ្នាំមកនេះ ពន្លកគុនខ្មែរ រិទ្ធី បូរិន បានឡើងប្រកួតចំនួន ៣២ដងហើយ គឺឈ្នះ២៦ ចាញ់៥ ស្មើ១ និងធ្លាប់ផ្តួលគូប្រកួតឲ្យសន្លប់ចំនួន ៧ដង។
យ៉ាងណាមិញ នៅក្នុងប្រវត្តិប្រកួតនេះ រិទ្ធី បូរិន បានក្លាយជាកីឡាករថ្នាលដំបូងគេ ដែលដណ្តើមបានខ្សែក្រវាត់ (ថ្នាលគុនខ្មែរ Super Fight) ក្នុងប្រភេទទម្ងន់ ២៩គីឡូក្រាម បន្ទាប់ពីបានយកឈ្នះ ពេជ្រ បញ្ញា ដោយពិន្ទុ នៅវគ្គផ្តាច់ព្រ័ត្រ កាលពីថ្ងៃទី១២ ខែកក្កដា ឆ្នាំ២០២៣ ហើយក៏ជាពេលដែល បូរិន ទទួលបានប្រាក់រង្វាន់ ១៥០០ ០០០ រៀល ជាលើកដំបូង រួមទាំងការទទួលប្រាក់តម្លៃខ្លួនចំនួន ១លានរៀលបន្ថែមទៀត ជាមួយការឈ្នះបានខ្សែក្រវាត់ (ថ្នាលគុនខ្មែរ Super Fight) នោះដែរ រិទ្ធី បូរិន ត្រូវបានដាក់ឲ្យប្រកួតអន្តរជាតិជាលើកដំបូង ក្នុងព្រឹត្តិការណ៍ Kun Khmer All Star វគ្គទី៨ នៅវិមានពហុកីឡដ្ឋានជាតិ កាលពីថ្ងៃទី២២ ខែសីហា ហើយនៅក្នុងការប្រកួតនោះ បូរិន បានយកឈ្នះកីឡាករឡាវ Khunlek VHGym សន្លប់ត្រឹមទឹកទី២ ផងដែរ។
អ្នកលេងថ្នាលគុនខ្មែរ រិទ្ធី បូរិន បាននិយាយបញ្ជាក់ថា៖ “ឪពុកម្តាយរបស់ខ្ញុំ មិនពេញចិត្តឲ្យខ្ញុំចូលហាត់ប្រដាល់ទេ ដោយខ្ញុំបានលួចមកហាត់ ប៉ុន្តែលោកគ្រូបានប្រាប់ថា ទាល់តែឲ្យពុកម៉ែមកសុំទើបគាត់ហ៊ានទទួលឲ្យហាត់ ព្រោះគាត់ខ្លាចហាត់ទៅគ្រេចជើងគ្រេចដៃ នាំឲ្យឪពុកម្តាយខ្ញុំថាឲ្យ តែទោះបីជាយ៉ាងណា ពេលនេះឪពុកម្តាយខ្ញុំគាត់លែងហាមឃាត់ទៀតហើយ ហើយគាត់មានការសប្បាយចិត្តនៅពេលខ្ញុំទទួលបានជ័យជម្នះបែបនេះ អ៊ីចឹងគាត់មានតែជំរុញខ្ញុំបន្ថែម”៕