ខ្លាចាស់ នួន សូរិយា ថា ពេជ្រ សម្បត្តិ អនាគតទៅអាចនឹងខ្លាំងជាង រថថាំង (Rodtang ទៅទៀត…
អតីតជើងខ្លាំងល្បីឈ្មោះ នៅកម្ពុជា លោក នួន សូរិយា និយាយថា ក្នុងរយៈពេល ២ឆ្នាំមកនេះ កីឡាករ ពេជ្រ សម្បត្តិ បានធ្វើការប្រកួតយ៉ាងល្អ និងល្បីដូចនេះ អនាគតទៅអាចនឹងខ្លាំងជាងអ្នកលេងគុនថៃ រថថាំង (Rodtang) ទៅទៀត។
ពិតណាស់ បើយោងតាមការឡាយនៅលើហ្វេសបុករបស់លោក នួន សូរិយា បានលើកឡើងថា៖ “រយៈពេលត្រឹម ២ឆ្នាំ កីឡាករ ពេជ្រ សម្បត្តិ ប្រកួតបានល្អ និងល្បីឈ្មោះបែបនេះ មិនមែនជារឿងធម្មតានោះឡើយ ប្រសិនបើបន្តខំប្រឹងហ្វឹកហាត់ និងថែទាំខ្លួនបានល្អនោះ អនាគតអាចនឹងខ្លាំងជាងអ្នកលេងគុនថៃ រថថាំង (Rodtang) ទៅទៀត ព្រោះថាកីឡាករថៃម្នាក់នេះ គឺរូបគេប្រឡូកក៏ដូចជាចូលប្រកួតតាំងពីវ័យក្មេងៗមកម្ល៉េះទម្រាំខ្លាំង ឬល្អមានកេរ្តិ៍ឈ្មោះដូចសព្វថ្ងៃ”។
គួរបញ្ជាក់ផងដែរថា ក្របីព្រៃ ពេជ្រ សម្បត្តិ ជាកីឡាករម្នាក់កំពុងល្បីឈ្មោះនៅកម្ពុជានាពេលបច្ចុប្បន្ននេះ ហើយរូបគេចាប់ទុកជាកីឡាករលំដាប់ A នៅកម្ពុជាហើយ អ្នកលេងគុនខ្មែររូបនេះជាកូនសិស្សរបស់លោក ពេជ្រ សុផាន់ គាត់ចូលប្រឡូកគុនខ្មែររយៈពេលប្រហែល ២ឆ្នាំប៉ុណ្ណោះ ពេជ្រ សម្បត្តិ មានខ្សែក្រវាត់ ២គ្រឿង គឺខ្សែក្រវាត់ខារ៉ាបាវ នៅសង្វៀនបាយ័ន និងខ្សែក្រវាត់គ្រុទ នៅសង្វៀន ទទក ថ្មីៗនេះរូបគេទើបឈ្នះបានឡានមួយគ្រឿងផងដែរ ក្នុងកម្មវិធីគុនខ្មែរអលស្តារ៕