សាមី បាននិយាយក្រោយពីចាញ់សន្លប់ក្រោមកណ្តាប់ដៃ ធន់ រិទ្ធី កាលពីយប់មិញ
កីឡាករថៃ សាមី បានឆាមេក បានចាញ់សន្លប់ក្រោមកណ្តាប់ដៃរបស់អ្នកលេងកម្ពុជា ធន់ រិទ្ធី នៅទឹកទី២ ក្នុងការប្រកួតដណ្តើមខ្សែក្រវាត់ Krud គុនខ្មែរអន្តរជាតិ នៅកាលពីយប់មិញ នៅសង្វៀនទូរទស្សន៍ជាតិកម្ពុជារហូតត្រូវបានបញ្ជូនទៅសង្គ្រោះនៅមន្ទីរពេទ្យ។
ពិតណាស់ ការប្រកួតនៅទឹកទី១ ធន់ រិទ្ធី ធ្វើបានយ៉ាងល្អ ដោយវាយចូលមុខ សាមី ជាច្រើនដៃ ប៉ុន្តែកីឡាករថៃម្នាក់នេះនៅតស៊ូ និងទប់ទល់រហូតចប់ទឹកទី១ ចូលដល់ទឹកទី២ អ្នកលេងគុនខ្មែរ ធន់ រិទ្ធី នៅតែធ្វើបានល្អ ដោយចេញកណ្តាប់ដៃទៅធ្ងន់ៗ និងចំគោលដៅ ដែលធ្វើឲ្យ សាមី ដួល ត្រូវបានអាជ្ញាកណ្តាលរាប់ ៨ ជាលើកទី១ ហើយបន្ទាប់មក ធន់ រិទ្ធី បានវាយ សាមី ឲ្យអាជ្ញាកណ្តាលរាប់លើកទី២ និងលើកទី ៣ ត្រូវបានអាជ្ញាកណ្តាលបញ្ឈប់ការប្រកួតតែម្តង។
យ៉ាងណាមិញ ក្រោយពីចាញ់សន្លប់ កាលពីយប់មិញ សាមី បានឆាមេក បានចេញវីដេអូ និយាយថា៖ “ការប្រកួតនេះ កីឡាករកម្ពុជា ធន់ រិទ្ធី ពិតជាធ្វើបានល្អ រូបគេបានប្រឹងប្រែងអស់ពីសមត្ថភាពហើយ រូបគេពិតជាទទួលស្គាល់ចំពោះបរាជ័យដ៏ធ្ងន់ធ្ងរមួយនេះ”។
សាមី បានបន្តទៀតថា៖ តាមពិតទៅរូបគេពិតជាប្រឹងប្រែង និងតស៊ូងើបឡើង ដើម្បីតតាំងឡើងវិញដែរ សម្រាប់ការប្រកួតនេះ ប៉ុន្តែនៅតែមិនអាចស៊ូទ្រាំនឹងទម្ងន់ដៃធ្ងន់របស់ ធន់ រិទ្ធី ដែលធ្វើឲ្យផ្ទៃមុខរបស់ខ្លួនហើមយ៉ាងដំណំ ហើយរូបគេក៏បានអគុណដល់អ្នកគាំទ្រទាំងកម្ពុជា និងថៃដែលបានយកចិត្តទុកដាក់ និងខ្វល់ខ្វាយពីខ្លួន”។
គួរបញ្ជាក់ផងដែរថា កាលពីយប់មិញនេះ សាមី បានឆាមេក ត្រូវបានបញ្ជូនទៅកាន់មន្ទីរពេទ្យភ្លាមៗ ដោយសារត្រូវកណ្តាប់ដៃយ៉ាងធ្ងន់ធ្ងររហូតចេញក្អួត ហើយនេះក៏ជាការសងសឹកបានសម្រេចរបស់ ធន់ រិទ្ធិ បន្ទាប់ពីធ្លាប់ចាញ់ សាមី ម្តងហើយ នេះក៏ជាជ័យជម្នះដែលធ្វើឲ្យ រិទ្ធិ ក្លាយជាម្ចាស់ខ្សែក្រវាត់អន្តរជាតិលើកដំបូងរបស់ខ្លួនដែរ៕